Լեհաստանի նորանշանակ արտգործնախարար Ռադոսլավ Սիկորսկին Բեռլին կատարած այցի ընթացքում դարձյալ բարձրաձայնել է ֆինանսական փոխհատուցման մասին, որը, նրա խոսքով, Գերմանիան պարտավոր է վճարել Երկրորդ աշխարհամարտի ընթացքում գործած հանցագործությունների դիմաց, տեղեկացնում է «Արմենպրես»-ը` վկայակոչելով Deutsche Welle-ի ռուսական ծառայության հաղորդումը։
«Այն, ինչ Գերմանիան Լեհաստանի հետ արել է Երկրորդ աշխարհամարտի ժամանակ, եղել է ահավոր և դաժան: Այդ իսկ պատճառով օգտակար կլինի, եթե Դաշնային Գերմանիան ստեղծագործական լուծում գտնի` արտահայտելով իր զղջումը: Եվ անցյալի էթիկական այդ վերաիմաստավորման արդյունքը հետո պետք է լինի ֆինանսական փոխհատուցման վճարումը», – ասել է լեհ դիվանագետն իր գերմանացի գործընկեր Անալենա Բերբոքի հետ բանակցություններից հետո Welt TV-ին տված հարցազրույցում:
Միաժամանակ, Սիկորսկին ընդգծել է, որ Գերմանիան, ինչպես Եվրոպայի մյուս ժողովրդավարական երկրները, Լեհաստանի դաշնակիցն է: