Վարչապետ Նիկոլ Փաշինյանն անդրադարձել է գնումների ոլորտին․ «Արդյո՞ք իմաստ ունի գնումների ոլորտի լավարկման ինստիտուցիոնալ մեխանիզմ ստեղծել, որ անկախ հանձնարարականներից գործի»,- ասել է նա։
Ֆինանսների նախարար Վահե Հովհաննիսյանն, արձագանքելով վարչապետին, նշել է, որ 2024թ. սկզբից նախաձեռնել են գնումների մասին նոր օրենքի պատրաստման գործընթաց։
Ըստ Հովհաննիսյանի՝ գործող օրենքն այլ իրականության մեջ է գրվել.
«Իրականությունը, որում հիմա ենք, և իրականությունը, որում գրվել է օրենքը, ահագին բան է փոխվել նաև ծավալների իմաստով, և կարծում ենք՝ այստեղ նոր բան անելու կարիք կա»։
Վարչապետը նշել է, որ 2019-ից ինչ-որ ոլորտի ֆինանսավորման ծավալները կրկնապատկվել են, հետո եղել են ստուգումներ, հարուցվել են քրեական գործեր, և 2023թ. ֆինանսավորումը հասել է 2018-ի մակարդակին.
«Պատճառն էդ է, մեզ մեղադրում են՝ փողը տալիս եք, հետո քար ու փետն առնում, մեր հետևից եք ընկնում․ չենք ուզում։ Բայց մենք էլ չենք ուզում չարաշահումներ լինեն։ Այսինքն, այս դիլեմաները պետք է առաջին հերթին գնումների մասին օրենսդրության ճկունությամբ ապահովենք, որ ընկերությունները մեզ հետ հաճույքով աշխատեն։ Հիմա տհաճությամբ ենք աշխատում փոխադարձաբար, որովհետև բոլորը բոլորին ամեն ինչի մեջ կասկածում են, և դա պրոբլեմ է, առավել ևս, երբ մեկ-երկու տեղ կասկածները առարկայանում են, դաշտը քայքայում է, ու ստեղծում է մթնոլորտ՝ լավ է ոչ մի բան չանենք, քան թե որևէ բան անենք»։
