ԱԺ «Հայաստան» խմբակցության պատգամավոր Արծվիկ Մինասյանն անդրադարձել է սահմանազատման և սահմանագծման հանձնաժողովների գործունեությանը։
Նրա խոսքով, հայտնի չէ՝ առհասարակ ի՞նչ սկզբունքների վրա է հիմնված այդ հանձնաժողովների աշխատանքը.
«Եթե ուշադիր նայենք, 2023թ․ դեկտեմբերին կառավարությունը ընդունել է մի որոշում, որը որևէ սկզբունք չի պարունակում իր մեջ, թե հայկական կողմը ինչ սկզբունքներով պետք է առաջնորդվի։ Ավելին, սևով սպիտակի վրա նշված է, որ Հայաստանի և Ադրբեջանի իշխանությունները ընդունում են այդ փաստաթուղթը, որը, որպես այդպիսին, աշխատակարգ էլ չի։
Սկզբունքները պետք է արտացոլված լինեն փաստաթղթում և բխեն միջազգային լավագույն փորձից, որը արտացոլված է ԵԱՀԿ փաստաթղթում։ Ալիևը հոխորտում է, թե այն, ինչ իր տիրապետության տակ է, իրենն է, ու մնացածներն էլ պետք է տանք, իսկ հայկական կողմը տալիս է 0 արձագանք»։
Ըստ նրա՝ սարսափելի է գիտակցել, որ իշխանությունը փորձում է ուրանալ երրորդ հանրապետության հիմքերը. «Դա նման է շենքի, որը կառուցված է կոնկրետ հիմքերի վրա, իրենք ասում են՝ բերեք այդ հիմքերը փոխենք։ Եթե փոխում ես հիմքը, նշանակում է՝ շենքը քանդում ես, դա նշանակում է՝ վերացնել երրորդ հանրապետությունը․ այսօրվա իշխանությունը գնում է դրան։ Այս մարդիկ ուրանում են ամեն ինչ․ չի բացառվում, որ վաղը Ծիծեռնակաբերդն էլ քանդել տան։ Քանի կա այս իշխանությունը, մենք անընդհատ պարտվելու ենք»։
