Արդարադատության փոխնախարար Արա Մկրտչյանը հայտարարել է, թե նոր սահմանադրության ընդունման հարցով կոնկրետ իրավակարգավորումների հետ կապված քննարկումներ դեռ չեն սկսվել․
«Դեռևս հստակ ժամկետ սահմանված չէ: Նույնիսկ դեռ քննարկումները սկսված չեն՝ կոնկրետ իրավակարգավորումների հետ կապված: Ուստի, այս պահին ժամկետների մասին խոսելը նույնպես արդի չէ»,- ասել է նա՝ լրագրողների հետ ճեպազրույցում անդրադառնալով հարցին, թե փորձ է արվում սահմանադրությունից հանել անկախության հռչակագրին արված հղումը։
Նա շեշտել է, որ նոր սահմանադրության ընդունման հարթությունում որևէ քննարկում չի եղել։
Փոխնախարարը միայն նշել է, որ լեգիտիմ և ճիշտ սահմանադրությունը երկրի իրավական հիմքն է և, ընդհանրապես, մրցունակության կարևոր բաղադրիչներից մեկը:
