Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսին ասել է, որ Իրանն զգալիորեն նվազեցրել է բարձր հարստացված ուրանի պաշարների ստեղծման տեմպերը։ Այդ մասին նա հայտնել է The New York Times-ին տված հարցազրույցում։
Գրոսիի խոսքով` բարձր հարստացված ուրանի արտադրության կտրուկ աճը, ամենայն հավանականությամբ, սկսել է նվազել:
Սակայն, ինչպես պնդում է ՄԱԳԱՏԷ-ի գլխավոր տնօրենը, Իրանը շարունակում է ավելացնել մինչև 60 % հարստացված ուրանի կուտակումը, որը հետագա հարստացման դեպքում կարող է օգտագործվել միջուկային զենքի ստեղծման համար։«Դիտվում է որոշ դանդաղում: Նրանք դեռ համալրում են պաշարները, բայց արդեն ավելի դանդաղ», – ասել է ՄԱԳԱՏԷ-ի գլխավոր տնօրենը։
Պարբերականի տվյալներով՝ Թեհրանն այդ գործողությունները ձեռնարկել է ԱՄՆ-ի հետ միջուկային գործարքի շուրջ բանակցությունները վերսկսելու ջանքերի շրջանակներում։
Դեկտեմբերի 26-ին Reuters գործակալությունը, վկայակոչելով ՄԱԳԱՏԷ-ի զեկույցը, հաղորդել էր, որ Իրանն ուրանի` մինչև 60 % հարստացման տեմերն ամսական 3 կիլոգրամից հասցրել է մինչև 9 կիլոգրամի:
Ավելի վաղ Reuters-ը, վկայակոչելով ՄԱԳԱՏԷ-ի գաղտնի զեկույցը, հայտնել էր, որ Իրանն ունի բավականաչափ քանակությամբ մինչև 60 % հարստացված ուրան, որը հետագա հարստացման դեպքում բավական կլինի երեք ատոմային ռումբի ստեղծման համար։
Իրանի ատոմային էներգիայի կազմակերպության ղեկավար Մոհամմադ Էսլամին հերքել է այդ հետևությունները։
ՄԱԳԱՏԷ-ի դասակարգման համաձայն՝ զենքի արտադրության համար ուրանն անհրաժեշտ է հարստացնել մինչև 90 %, իսկ միջուկային լիցք ստեղծելու համար «տեսականորեն բավական է» մոտ 42 կգ նյութը։
