Մեր գործընկերությունը ԵՄ-ի հետ երբեք այդպիսի ինտենսիվ մակարդակի չի եղել. ԱԳ փոխնախարար

«Մեր գործընկերությունը ԵՄ-ի հետ երբեք այդպիսի ինտենսիվ մակարդակի չի եղել։ Բնական է, որ հնարավոր բոլոր տարբերակները քննարկվում են։ Իհարկե, այդ գործընթացը մենք տանում ենք ԵՄ-ի հետ համատեղ։ Եվ, ինչպես նշեց վարչապետը, Հայաստանի շահերից բխող որոշումներն անհրաժեշտության դեպքում կընդունվեն», – լրագրողների հետ ճեպազրույցում հայտարարել է Հայաստանի ԱԳ փոխնախարար Պարույր Հովհաննիսյանը։

Անդրադառնալով Միացյալ Թագավորության պաշտպանության նախարարի հայտարարությանը, որ պատրաստ են աջակցել Հայաստանին՝ Ռուսաստանից եկող սպառնալիքների դեպքում, Հովհաննիսյանն ասել է, որ երևի ավելի լավ է այդ հարցն ուղղել այդ երկրի պաշտոնյաներին։

«Ինչ վերաբերում է մեր հարաբերություններին, տեղյակ եք՝ անցած տարի հաստատվեց համագործակցության նոր ֆորմատ՝ ռազմավարական երկխոսության ֆորմատ ՄԹ-ի հետ, ունեցանք մի շարք կարևոր այցեր, այդ երկրի հետ մեր հարաբերություններն ունեն նոր դինամիկա, այլ մեկնաբանություններ չեմ կարող տալ», – հավելել է փոխնախարարը։