Իրանի ԱԳ նախարար Հոսեյն Ամիր Աբդոլլահիանը հեռախոսազրույց է ունեցել Գերմանիայի արտգործնախարար Աննալենա Բերբոքի հետ, որի ընթացքում կողմերը քննարկել են Իսլամական Հանրապետության կողմից Իսրայելի տարածքում իրականացված հարձակումը, ասված է Իրանի ԱԳՆ Telegram ալիքում հրապարակված հաղորդագրության մեջ։
Զրույցի ընթացքում Աբդոլլահիանը բացատրել է, որ Իրանը գործողությունն իրականացնելիս նպատակադրել է «նախազգուշացնել Իսրայելին կարմիր գծերը հատելու հետեւանքների մասին»։
Թեհրանը, ըստ նախարարի, «նվազագույն և ճշգրիտ գործողություն է իրականացրել՝ ուղղված իսրայելական ռազմական օբյեկտների դեմ», որտեղից հարձակում է իրականացվել Դամասկոսում Իսլամական Հանրապետության դեսպանատան հյուպատոսական բաժնի վրա։ Իրանի ԱԳՆ ղեկավարը նաև հույս է հայտնել, որ «Գերմանիայի ջանքերն ուղղված կլինեն Գազայի հատվածում հակամարտության դադարեցմանը» և Մերձավոր Արևելքում անվտանգության հաստատմանը, այլ ոչ թե «Իրանի օրինական գործողությունները դատապարտելուն»։
