«Մարդու իրավունքների պաշտպանության և հանրային հարցերի մշտական հանձնաժողովն առաջարկել է արտահերթ նիստում ելույթի հնարավորություն տալ Սինջարում տեղի ունեցած ցեղասպանության ականատես Ֆերիալ Սաիդ Թալալին». այս մասին այսօր խորհրդարանում հայտարարեց Աժ փոխխոսնակ Հակոբ Արշակյանը, որից հետո քվեարկության դրվեց «ՀՀ տոների և հիշատակի օրերի մասին» օրենքում լրացում կատարելու մասին նախագծի քննարկմանը հրավիրված անձին ելույթի իրավունք տալու մասին ԱԺ որոշման նախագիծը ընդունելու մասին հարցը։

ԱԺ-ն ընդունեց որոշումը, որից հետո խորհրդարանը քննարկման դրեց «ՀՀ տոների և հիշատակի օրերի մասին» օրենքում լրացում կատարելու մասին օրերի նախագիծն առաջին ընթերցմամբ ընդունելու մասին հարցը։

Հիմնական զեկուցող՝ ԱԺ «Քաղաքացիական պայմանագիր» խմբակցության պատգամավոր Ռուստամ Բաքոյանը նախ շնորհակալություն հայտնեց վարչապետ Նիկոլ Փաշինյանին և Ալեն Սիմոնյանին, իշխանության և ընդդիմության պատգամավորներին, ապա ներկայացրեց ասելիքը.

«Ցեղասպանությունը հանցանք է մարդկության դեմ։ Ընդ որում, ամենամեծը։ Սա 1915թ․ տեղի ունեցած հայոց ցեղասպանության ոչ ճիշտ, ոչ պատշաճ դատապարտման ուղիղ արդյունք է և ուղիղ հետևանք։

Հայերի և եզդիների ճակատագրերը բավականին նման են, որոնք միշտ խաչվել են, և մենք պատմության տարբեր թատերաբեմերում միշտ հանդիպել ենք նույն իրավիճակներին։

ՀՀ-ն, հավատարիմ մնալով ցեղասպանությունների կանխարգելման և դատապարտման գործընթացում իր որդեգրած քաղաքականությանը և առաջնահերթությանը, 2014թ. ՄԱԿ բարձր ամբիոնից դատապարտեց Իրաքում եզդիների ցեղասպանությունը»։

Բաքոյանի խոսքով՝ պատմական օր է և՛ եզդիների, և՛ Հայաստանի համար, որովհետև տասնյակ պետություններ դատապարտել են եզդիների ցեղասպանությունը, բայց առաջին դեպքն է, երբ տոների և հիշատակի օրերի մասին օրենքում որևէ պետություն ամրագրում է եզդիների ցեղասպանությունը՝ որպես հիշատակի օր։

Պատգամավորը հայտարարեց՝ կարիք կա կանգնեցնել եզդիների ցեղասպանությունը։