Երիտասարդը, կարծում եմ, անցել է բոլոր սահմանները, ու օրենքի առջև պետք է պատասխան տա: Այս մասին խորհրդարանում լրագրողների հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Հակոբ Ասլանյանը՝ անդրադառնալով հանրային տրանսպորտում իր մասնակցությամբ տեղի ունեցած միջադեպին:
Լրագրողների խնդրանքին՝ նկարագրել տեղի ունեցածը՝ պատգամավորը ասաց` երբ ինքը ցանկացել է վճարել և իջնել տրանսպորտից, վերջինս փակել է իր ճանապարհը և վիրավորական արտահայտություններ արել:
Երբ պատգամավորը փորձել է իջնել, երիտասարդը փորձել է խոչընդոտել:
«Այդ ժամանակ ես հրում եմ նրան ու իջնում եմ, այդքան բան»,- ասաց Հակոբ Ասլանյանը:
Լրագրողներից մեկի դիտարկմանը՝ ինչու պատգամավորը տեղի ունեցածը չի գնահատում որպես «էմոցիոնալ պոռթկում», Ասլանյանը հակադարձեց.
«Դա էմոցիոնալ պոռթկում չէ, այլ հստակ կանխամտածված մոտեցում»:
«Ես նստած եմ ինձ համար հանգիստ, գալիս եմ, որ կանգառում իջնեմ, ինքը դիմացս փակում է»,- պատմեց պատգամավորը՝ ընդգծելով՝ նա նկարահանելու իրավունք չուներ:
«Նկարահանելը նշանակում է մտնել իմ սեփական, անձնական տարածքը: Թող խոսեր, թող ինչ-որ բան ասեր, բայց նա նկարում էր: Դա ուղղորդված մոտեցում էր»,- ընդգծեց ՔՊ խմբակցության պատգամավորը:
Դիտարկմանը՝ արդյո՞ք նա ինչ-որ քաղաքական ուժի է տեսնում կատարվածի հետևում, պատգամավորը նշեց՝ գուցե քաղաքական գաղափար է տեսնում:
«Քննությունը գնում է, կպարզվի»,- ասաց Ասլանյանը:
Հարցին՝ եթե նման բան տեղի ունենար ընդդիմադիր պատգամավորներից մեկի հետ, օրենքը նման ուժով կգործե՞ր, Հակոբ Ասլանյանը տվեց դրական պատասխան:
«Միանշանակ: Օրենքը պետք է գործի բոլորի նկատմամբ: Մեզնից յուրաքանչյուրի իրավունքները ավարտվում են այնտեղ, որտեղ սկսվում են դիմացինի իրավունքները»,- համոզմունք հայտնեց պատգամավորը:
Նրա խոսքով՝ սկզբում մտադրություն չի ունեցել դիմել իրավապահներին, սակայն ինքը դա չէր հանրայնացնի, եթե երիտասարդը դա չտարածեր սոցցանցում:
«Ինձ զանգեր եղան, և ես ասացի, ես դա բացելու նպատակ չունեմ, արել է, թող ինքն իրենով տապակվի, բայց մի քիչ հետո սկսում են զանգերը, որ արդեն Ֆեյսբուքը պայթում է: Այդ դեպքում ուրիշ բան չէր մնում անելու: Նորից եմ ասում՝ եթե ինքը դա Ֆեյսբուք չգցեր, այո՛, ես չէի պատրաստվում որևէ մի բան անել»,- ընդգծեց Հակոբ Ասլանյանը:
Լրագրողների հարցին՝ արդյո՞ք առերեսում եղել է, պատգամավորը տվեց դրական պատասխան:
«Ես գտնում եմ, որ մենք պետություն ենք կառուցում և պետության կառուցման դեպքում ամեն մարդ օրենքի առջև պետք է պատասխան տա իր արածների համար»,- խոսքը եզրափակեց Ասլանյանը:
