Ադրբեջանի ԱԳ նախարարության խոսնակ Այխան Հաջիզադեն կրկին մեղադրանքներ է հնչեցրել Ֆրանսիայի հասցեին․
«Չնայած Ադրբեջանի կողմից միակողմանի գործողությունների վերաբերյալ ֆրանսիական կողմի մեղադրանքներին, մեր երկրի քայլերն ու պաշտոնական հայտարարությունները Ֆրանսիայի հասցեին ընդամենը պատասխան էին այդ երկրի ապակառուցողական գործունեությանը: Չնայած մեր երկրի դեմ ուղղված զրպարտչական արշավին, մենք միշտ բաց ենք եղել երկխոսության համար», – նշել է նա։
Ըստ Ա. Հաջիզադեի, «Ֆրանսիան լուրջ կասկածի տակ է դրել Ադրբեջանի և Հայաստանի հարաբերությունների կարգավորման ջանքերը ինքնիշխանության և տարածքային ամբողջականության հիման վրա, մասնավորապես, վերջին երեքուկես տարվա ընթացքում ձեռնարկված քայլերով, դրանով իսկ սրելով իրավիճակը»․
«Միևնույն ժամանակ, ցերեկվա պես պարզ է, որ Ֆրանսիայի գործողությունները, որը համակողմանիորեն զինում է Հայաստանին և առաջ է մղում ռազմատենչությունը տարածաշրջանում, չեն ծառայում խաղաղությանը։
Ադրբեջանական կողմը բազմիցս հայտարարել է Ֆրանսիային, որ սպառնալիքների և ճնշումների լեզվով խոսելը ոչ մի արդյունք չի տա, և ևս մեկ անգամ հայտարարում է, որ կձեռնարկի բոլոր անհրաժեշտ միջոցները իր ազգային շահերը պաշտպանելու համար», – ընդգծել է նա:
