Գազայի հատվածում ռմբակոծություններից ու մարտերից փլատակների մաքրումը կպահանջի առնվազն 14 տարի: Այս մասին հայտնում է քաթարական Al Jazeera հեռուստաալիքը՝ հղում կատարելով ՄԱԿ-ի հումանիտար հարցերի համակարգման գրասենյակին (OCHA):
ՄԱԿ-ի գնահատականներով՝ Գազայի հատվածում մարտերը հանգեցրել են շուրջ 37,5 միլիոն տոննա փլատակների գոյացմանը ողջ անկլավում։
Դրա մեծ մասը լի է չպայթած ռումբերով և այլ զինամթերքով, և մաքրելը կարող է տևել առնվազն 14 տարի:
Ամենաշատ տուժած շրջանները գտնվում են գոտու հյուսիսում, որին հաջորդում են Խան Յունիսը՝ հարավում, Դեյր ալ-Բալահը՝ Գազայի կենտրոնում և Ռաֆահը՝ ամենահարավային անկլավում, որը իսրայելական ուժերը ժամանակին անվանել են «անվտանգ գոտի»:
ՄԱԿ-ի հումանիտար հարցերի համակարգման գրասենյակի վերջին զեկույցում նշվում է նաև, որ Գազայում արագ աճող հոգեկան առողջության ճգնաժամ է:
«Ավելի քան 200 օրվա անողոք բռնությունն ու ավերածությունները ավելի են խորացրել հոգեսոցիալական կարիքները, հատկապես ավելի քան մեկ միլիոն երեխաների շրջանում, որոնք ՅՈՒՆԻՍԵՖ-ի գնահատմամբ՝ հոգեկան առողջության, հոգեբանական և սոցիալական աջակցության կարիք ունեն», – մեջբերում է հեռուստաալիքը փաստաթղթից մի հատված:
