Մայիսի 1-ին՝ ժամը 14։00-ի սահմաններում, ՀՀ ներքին գործերի նախարարության ոստիկանության Սիսիանի բաժին «Սիսիան» բժշկական կենտրոնից ահազանգ է ստացվել, որ «դեմքի, կրծքավանդակի առաջնային պատի, որովայնի առաջնային պատի, վերին վերջույթների պայթյունային-բեկորային վնասումներ, ձախ դաստակի ջնջխված արյունահոսող վերք, 5-րդ մատի անդամահատում» ախտորոշմամբ իրենց մոտ է տեղափոխվել մի երեխա։
Պարզվել է, վիրավորը Սյունիքի մարզի գյուղերից մեկի բնակիչ 14-ամյա տղա է, որը գնացել է սինդրիկ հավաքելու, որտեղ էլ ինչ-որ կասկածելի առարկայի պայթյուն է տեղի ունեցել, ու երեխան ստացել է վնասվածքներ։
Դեպքի փաստով Սիսիանի քննչական բաժնում նախաձեռնվել է քրեական վարույթ։
