Վարչապետ Նիկոլ Փաշինյանն անդրադարձել է սահմանազատման գործընթացը կասեցնելու մասին հոգևորականների պահանջին և մեկնարկած շարժմանը․
«Ենթադրենք՝ այսպիսի իրավիճակ. ես ասում եմ՝ շատ լավ, հարգելի լրագրողներ, հարգելի եպիսկոպոսներ, վեհափառ հայրապետ։ Որ ասում եք, շատ լավ․ վաղը առավոտից կամ, ինչու առավոտից, այսօր ցերեկվանից կասեցնում ենք գործընթացը։ Իսկ ի՞նչ է լինում դրանից հետո։
Դրանից հետո լինելու է պարզ բան՝ սկսվելու է պատերազմ։ Իսկ ի՞նչ նպատակ է ունենալու այդ պատերազմը. ընդ որում, հավատացած եմ, և վերլուծելով, թե ովքեր և ինչպես են այս պրոցեսին արձագանքում, նպատակը հենց դա է․ ի սկզբանե թույլ չտալ, որ տեղի ունենա սահմանազատում, որի անխուսափելի հետևանքը կլինի պատերազմը։
Ընդ որում, պատերազմն այդ պարագայում դելեգիտիմացված չի լինի ինչ-որ առումով, և այն ուժերը, որոնք պահանջում են սահմանազատումը դադարեցնել, բնականաբար, նաև արտաքին որոշ ուժերի աջակցությամբ ամեն ինչ կանեն, որ Հայաստանի նոր տարածքներ օկուպացվեն՝ դա օգտագործելու Հայաստանում քաղաքական փոփոխություններ անելու համար»։
Ըստ նրա՝ պատերազմը ներքին ու արտաքին ուժերին հարկավոր է առանց ընտրությունների իշխանափոխություն անելու համար.
«Ովքեր ասում են կասեցում, քաղաքական օրակարգը հետևյալն է՝ սադրել պատերազմ, պատերազմի արդյունքում իշխանափոխություն ապահովել ոչ ընտրական եղանակով, իսկ դա հնարավոր է, եթե երկրի տարածքներ օկուպացվեն, հաջորդաբար՝ ոչ լեգիտիմ, մարիոնետային իշխանության հաստատում երկրում և երկրի ինքնիշխանության ու պետականության դե ֆակտո լուծարում՝ դե յուրե լուծարումից առաջ։ Սա է էդ սցենարը, և դա այնքա՜ն ակնհայտ է»։
