Իսրայելը հրադադարի նոր առաջարկ է ներկայացրել ՀԱՄԱՍ-ին. Բայդեն

Իսրայելը Կատարի միջոցով հրադադարի նոր առաջարկ է ներկայացրել ՀԱՄԱՍ շարժմանը՝ հայտարարել է ԱՄՆ նախագահը:

Ջո Բայդենի խոսքով՝ այն բաղկացած է երեք փուլից՝ Գազայի հատվածից իսրայելական զորքերի դուրսբերում և ՀԱՄԱՍ-ի գերեվարած պատանդների վերադարձ, անժամկետ զինադադար և Գազայի հատվածի վերականգնման մեկնարկ։ Առաջին փուլում նախատեսվում է վեցշաբաթյա հրադադար հաստատել։

Սպիտակ տան ղեկավարը թե՛ ՀԱՄԱՍ-ին, թե՛ Իսրայելի իշխանությանը կոչ է արել հետևել այդ ծրագրին՝ հաշվի առնելով, որ, ըստ Բայդենի, Իսրայելում հակամարտությունը երկարաձգելու կողմնակիցներ կան:

«Աշխատում ենք «երկու պետության» բանաձևով կարգավորման ուղղությամբ՝ ապահովելու անվտանգություն, բարգավաճում և կայուն խաղաղություն Իսրայելի և Պաղեստինի համար»,- շեշտել է Բայդենը:

Նա համոզմունք է հայտնել, որ գործարքը կնպաստի Իսրայելի անվտանգությանը: Նա միաժամանակ աջակցություն է հայտնել ինքնապաշտպանվելու՝ Իսրայելի իրավունքին և խոստացել լինել Թել Ավիվի կողքին:

ԱՄՆ նախագահը նաև հայտարարել է, որ Գազայի հատվածում տեղի ունեցողը ցեղասպանություն չէ:

Բայդենը դատապարտել է Իսրայելի վարչապետի և պաշտպանության նախարարի համար ձերբակալման օրդեր տրամադրելու՝ Միջազգային քրեական դատարանի գլխավոր դատախազի պահանջը:

ՀԱՄԱՍ-ն ընդհանուր առմամբ դրական է արձագանքել հրադադարի առաջարկին: Իսրայելական կողմը հայտարարել է, որ անելու է հնարավորը՝ վերադարձնելու գերիներին, սակայն չի հրաժարվում ՀԱՄԱՍ-ը ոչնչացնելու նպատակից:

Թիվ 1