ՀՀ-ն պատրաստ է ԵՄ-ին լինել մոտիկ այնքան, որքան ԵՄ-ը հնարավոր կհամարի. վարչապետ

Վարչապետ Նիկոլ Փաշինյանն անդրադարձել է ԵՄ-ին ՀՀ անդամակցության վերաբերյալ հանրաքվե անելու՝ չորս կուսակցությունների առաջարկին։

Նա հիշեցրել է ԵԽԽՎ ամբիոնից արած հայտարարությունը՝ ՀՀ-ն պատրաստ է ԵՄ-ին լինել մոտիկ այնքան, որքան ԵՄ-ը հնարավոր կհամարի։ Նա նշել է, որ եթե մտածեր, թե Հայաստանի ժողովուրդն այդ գաղափարին չի աջակցում, նման հայտարարություն չէր անի. «Խնդիրն ինչո՞ւմ է՝ անել հանրաքվե՝ պարզելու ժողովրդի կարծի՞քը։ Կներեք, բայց ես, որպես պաշտոնյա, որ իրավասու է ներկայացնել ժողովրդին, գիտեմ ժողովրդի կարծիքը»։

Նա խոսել է հանրաքվե անել-չանելու նպատակահարմարության մասին։

Ըստ վարչապետի՝ քարոզարշավին ժողովուրդը կոնկրետ քայլերի ու ժամկետների վերաբերյալ հարցեր է տալու, նաև հարցնելու է՝ ԵՄ-ը պատրա՞ստ է արդյոք դրան.

«Հիմա ԵՄ-ը որքանո՞վ է պատրաստ։ Այդ հարցի պատասխանը ես կարո՞ղ եմ տալ այսօր։ Ոչ, չեմ կարող, որովհետև այսօր ԵՄ-ում էլ են տեղի ունենում պրոցեսներ, որը մենք պետք է գնահատենք։ ԵՄ-ում ընտրություններ են տեղի ունենում, որոնց արդյունքները առնվազն որոշակի հարցեր են առաջացնում։ Մենք հնարավոր բարձր ձևով հայտարարել ենք ԵՄ-ին մերձենալու մեր քաղաքական կամի մասին»,- ասել է նա։