«Բելառուսը Հայաստանին հրավիրել է մասնակցելու Մինսկի զորահանդեսին». Բելառուսի ԱԽ քարտուղար

«Բելառուսը Հայաստանին հրավիրել էր մասնակցելու Մինսկում կայանալիք զորահանդեսին, սակայն մտացածին, սուբյեկտիվ պատճառներով այդ երկրի շքերթային հաշվարկները չեն ժամանել»․ այս մասին, պատասխանելով լրագրողների հարցերին, ասել է Բելառուսի անվտանգության խորհրդի քարտուղար Ալեքսանդր Վոլֆովիչը․ հայտնում է «Բելտա»-ն։

Մինսկում Անկախության օրվա զորահանդեսի մասնակիցների թվում էին մի շարք պետությունների՝ Ռուսաստանի, Ադրբեջանի, Ղազախստանի, Չինաստանի, Ղրղզստանի, Տաջիկստանի և Ուզբեկստանի ներկայացուցիչներ ու զինծառայողների զորահանդեսային հաշվարկներ: Վոլֆովիչն ասել է, որ Հայաստանի ներկայացուցիչներին նույնպես հրավիրել են մասնակցելու Մինսկում կայանալիք զորահանդեսին․ «Հայաստանը դեռ ՀԱՊԿ անդամ է, նրան հրավիրում են բոլոր համաժողովներին», – հավելել է նա: Այս օրերին Մինսկում անցկացվում է ևս մեկ միջազգային միջոցառում՝ ԱՊՀ պաշտպանության նախարարների խորհուրդը: 

«Հրավիրվել է նաև Հայաստանը։ Բայց ինչ-որ մտացածին, ամենայն հավանականությամբ՝ սուբյեկտիվ պատճառներով, ցավոք, Հայաստանի պատվիրակությունը և շքերթային հաշվարկները չեն ժամանել շքերթին մասնակցելու համար», – փաստել է Վոլֆովիչը։