Իրանը բացահայտում է Ռուսաստանի հետ տարաձայնությունը

Իրանի ԱԳՆ պաշտոնական ներկայացուցիչ Նասեր Քանանին սեպտեմբերի 9-ին անդրադարձել է Ռուսաստանի հետ համագործակցության պայմանագրին եւ առաջին անգամ հնչեցրել փաստաթղթի պաշտոնական անվանումը. «Իրանի եւ Ռուսաստանի հարաբերությունների զարգացման ուղեցույց»:

Նույն պայմանագրի վերաբերյալ Մոսկվայի կողմից օգտագործվում է «համապարփակ համագործակցության մասին» բնորոշումը: Քանանիի խոսքից հասկացվում է, որ պայմանագրի ստորագրումը հնարավոր է, բայց քննարկումները շարունակվում են, ինչպես նախկինում: Իրանի արտգործնախարարության խոսնակը նկատել է տվել, որ այսպես կոչված «Զանգեզուրի միջանցքի» թեմայով քաղաքական եւ փորձագիտական կարծիքները հնչել են Ադրբեջան «պարոն Պուտինի այցից հետո»:

Նա խորհուրդ է տվել «ուշադիր կարդալ» Ռուսաստանի պաշտոնատար անձանց հայտարարությունները:

Նա մեկնաբանել է տարածաշրջանում կոմունիկացիաների «ազատ ապաշրջափակման» հարցում Իրանի դիրքորոշումը. ամեն ինչ պետք է տեղի ունենա տարածաշրջանի երկրների ինքնիշխանության ներքո՝ հարգելով բոլոր կողմերի շահերը:

Դիվանագիտական այդ ձեւակերպումից պարզորոշ հասկացվում է, որ Իրանը դեմ չէ Սյունիքում կոմունիկացիաների բացմանը, եթե «միջանցքը» գտնվի Հայաստանի լիարժեք իրավազորության ներքո:

Ավելի վաղ Նասեր Քանանին անոնսավորել է, որ Իրանը հանդես է եկել Ռուսաստանի եւ Ադրբեջանի արտաքին գործերի նախարարների հետ այդ հարցը քննարկելու նախաձեռնությամբ: Մոսկվան եւ Բաքուն առայժմ այդ հարցի վերաբերյալ պաշտոնական տեսակետ չեն հայտնել:

Հոկտեմբերին Կազանում կգումարվի ԲՐԻԿՍ-ի գագաթաժողով, որ պետք է հաստատի այդ կազմակերպությանն Իրանի պաշտոնական անդամակցությունը: Այդ առթիվ Իրանի նախագահ Մասուդ Փեզեշքիանը հույս է հայտնել, որ Ռուսաստանի հետ պայմանագրի ստորագրումը հնարավոր է:

Թիվ 1 սյունակ, Վահրամ Աթանեսյան