«Հյուսիս-հարավն առաջին անգամ նաև հարավում է իրականացվում». Սանոսյան

Տարածքային կառավարման և ենթակառուցվածքների նախարար Գնել Սանոսյանը պատասխանել է Radar Armenia-ի հարցին, թե երբ է իրականացվելու Հյուսիս-հարավ ճանապարհի կառուցումը։

Սանոսյանի խոսքով՝ այն իրականացվում է, ընդ որում, առաջին անգամ՝ նաև հարավում.

«Որքան էլ երկար ժամանակ կոչվում էր Հյուսիս-հարավ, միայն հյուսիսում էր ծրագիրը։ Երևի հարցն ավելի շատ այնպիսին է, թե երբ է ավարտվելու։

Ուրախությամբ պետք է փաստել, որ Երևանից դեպի Գյումրի ուղղությամբ աշխատանքները ավարտին են մոտենում։ 2025թ. կունենանք Երևանից դեպի Գյումրի ամբողջովին կառուցված Հյուսիս-հարավ»,- ասաց նա։

Նախարարը նշեց, որ հարավում աշխատանքները շատ են կարևորում՝ ընդգծելով, որ առաջին հատվածը՝ 32 կմ ճանապարհի շինարարությունն, ընթացքի մեջ է։

Նախարարը դժվարացավ ժամկետներ նշել Արտաշատից Սիսիան հատվածի մասով, քանի որ դեռ նախագիծը չկա։