Ադրբեջանում մարդու իրավունքների հետ կապված իրավիճակը հուսադրող չէ. Աթանեսյան

-Մարդու իրավունքների եւ ազատությունների հետ կապված իրավիճակն Ադրբեջանում հուսադրող չէ,- «Ազատություն» ռադիոկայանին հարցազրույցում ասել է ադրբեջանցի իրավապաշտպան Ռուվաթ Սաֆարովը:

Նրա գնահատմամբ, դա կախված է իշխանության քաղաքական կամքից: Սաֆարովը համոզված է, որ Իլհամ Ալիեւի վարչակազմը կամք դրսեւորելու փոխարեն «ավելի է մեծացնում բռնաճնշումը»: Նա հիշեցնում է, որ տասնամյակներ շարունակ իշխանությունը ժողովրդավարության բռնաճնշումը պայմանավորել է ղարաբաղյան հակամարտության չկարգավորվածության հետ, եւ ընդդիմությունը, քաղաքացիական հասարակությունը «դա ընդունել են ըմբռնումով եւ սպասել, որ խնդրի կարգավորումից հետո կգա բարեփոխումների ժամանակը»:

Այսօր Ադրբեջանում ավելի քան երեք հարյուր քաղբանտարկյալ կա: Անցյալ տարվա նոյեմբերից ի վեր շուրջ երեք տասնյակ լրագրող, քաղաքացիական ակտիվիստ է կալանավորվել: Նրանց սպասում է երկարաժամկետ ազատազրկում: Իրավիճակը բերել է նրան, որ հանրությունը լիովին օտարվել է քաղաքական կյանքից: Դրա ապացույցը վերջին ընտրություններն են, որոնց մասնակցել է ձայնի իրավունք ունեցող բնակչության ոչ ավելի, քան մեկ քառորդը: Նրանք հիմնականում պետական ծառայողներ էին, զինվորականներ, իրավապահ եւ կրթական համակարգի պաշտոնյաներ, գործարար աշխարհի եւ նրա հետ կապակցված շչջանակների ներկայացուցիչներ: Հայտնի է դարձել, որ սեպտեմբերի 30-ին ԵԽԽՎ աշնանային նստաշրջանի առաջին օրը հրատապ կարգով կքննարկվի Ադրբեջանում մարդու իրավունքների եւ ազատությունների հարցը: Սպասվում է, որ հոկտեմբերի 3-ին այդ հարցով ԵԽԽՎ-ում կանցկացվի քվեարկություն: Միջազգային տասնյակ իրավապաշտպան կազմակերպություններ Եվրոպայի խորհրդին հանրագիր են հղել, որով պահանջում են Ադրբեջանի համար «սահմանել հատուկ չափորոշիչներ եւ միայն դրանց համապատասխանելու դեպքում քննության առնել ԵԽԽՎ-ում ադրբեջանական պատվիրակության լիազորությունների վերականգնման հարցը»:

ԵԽԽՎ-ում ադրբեջանական պատվիրակության մանդատը հունվարին մեկ տարի ժամկետով դադարեցվել է: Հարցի քննարկումն սպասվում է 2025թ. հունվարին: Պատվիրակության մանդատը չվերականգնելու դեպքում Բաքուն սպառնում է դադարեցնել Եվրոպայի խորհրդին անդամակցությունը: