Կառավարությունն իրականացնում է բալանսավորման արտաքին քաղաքականություն. հայտարարել է վարչապետ Նիկոլ Փաշինյանն ԱԺ-կառավարություն հարցուպատասխանի ժամանակ։
Նա առաջարկել է դիտարկել նաև տարածաշրջանային հարթությունը.
«Մենք տարածաշրջանային մեր գործերը դիտարկում ենք ընդհանուր համատեքստում, բայց, ինչ-որ առումով, նաև առանձին համատեքստում»։
Վարչապետը հիշեցրել է, որ Հայաստանը որոշել է մասնակցել 3+3 հարթակի քննարկումներին.
«Դա մեր արտաքին քաղաքականության տարածաշրջանային հարթությունն է ընդգծում»։
Խոսելով Իրանի հետ հարաբերությունների մասին՝ նա ընդգծել է, որ դրանք բնականոն են և իրենք քաղաքական որոշման արդյունք չեն․
«Քաղաքական որոշումն է բնականոնության արդյունք»։
Ըստ նրա՝ նույնը կարելի է ասել նաև Վրաստանի հետ հարաբերությունների մասին։
«Մեր քաղաքականությունն ուղղված է Թուրքիայի և Ադրբեջանի հետ հարաբերությունները կարգավորելուն»,- ասել է նա՝ հավելելով, որ անվտանգային խնդիր է այդպիսով լուծվում․
«Մեր անվտանգությունը պետք է երաշխավորենք ոչ միայն զինվորով ու բանակով, այլև՝ մեր քաղաքականությամբ, տնտեսությամբ, սոցիալ-հոգեբանությամբ, մեր խոսացածով, մեր՝ սադրանքներին տրվել-չտրվելու հմտություններով կամ հակառակը»։
Փաշինյանը նաև նշել է, որ ճիշտ ռելսերի վրա դրված արտաքին քաղաքականություն է վարվում․ «Եթե ուշադրություն եք դարձրել, չենք մերժում որևէ ուղղությամբ որևէ հարաբերություն, բայց որոշակի ուղղություններում զարգացումներն ավելի ակտիվ են»։
