Վրաստանի վարչապետ Իրակլի Կոբախիձեն ներկայացրել է «Վրացական երազանքի» նախընտրական ծրագիրը: Այն ներառում է հարաբերությունների կարգավորում ԱՄՆ-ի, Եվրամիության և Ռուսաստանի հետ:
«Պրագմատիկ քաղաքականությունը և Ռուսաստանի հետ հակամարտության խաղաղ կարգավորումը կարևորագույն առաջնահերթություններից են»,- հայտարարել է Կոբախիձեն:
Խոսելով առաջիկա չորս տարվա համար գործող իշխանության արտաքին քաղաքական ծրագրերի մասին՝ Կոբախիձեն պետական կարևորագույն հարց է որակել ԱՄՆ-ի և Եվրամիության հետ հարաբերություններին նոր թափ հաղորդելը:
Վրաստանի վարչապետը որպես առաջնային խնդիր նշել է նաև ՆԱՏՕ-ի հետ հարաբերությունների խորացումը և Չինաստանի հետ ռազմավարական գործընկերությունը:
Նա կարևորել է նաև հարևան Հայաստանի, Ադրբեջանի և Թուրքիայի հետ հարաբերությունների խորացումը։
Վրաստանում խորհրդարանի ընտրությունը տեղի կունենա հոկտեմբերի 26-ին:
