Երեւանի քաղաքապետի մամուլի խոսնակ Հակոբ Կարապետյանը հրապարակել է համայնքին նվիրատվություն կատարած անձանց անունները, որոնք պիտի պարգեւատրվեն պատվոգրերով:
Դրանց թվում է նաեւ «Ալեքս ընդ հոլդինգ» ՍՊԸ-ի նվիրաբերած 3 ԿամԱԶ: Մեկնաբանություններում խոսնակը հերքում է, որ դա Սամվել Ալեքսանյանինն է:
«Ինչպես արդեն տեղեկացրել ենք, մի շարք տնտեսվարող կազմակերպություններ եւ անհատներ քաղաքային տնտեսության զարգացմանն օժանդակելու նպատակով նվիրատվություններ են արել քաղաքին: Տեղեկացրել ենք նաեւ, որ քաղաքապետը մտադիր է տարեմուտից առաջ ամփոփել այս նվիրատվությունները եւ շնորհակալագրեր ու պատվոգրեր հանձնել սոցիալական բարձր պատասխանատվություն դրսեւորած անհատներին ու կազմակերպություններին: Հասկանալի է, որ պարգեւատրվածների անունները հանրության սեփականությունն էին դառնալու»,- մասնավորապես գրում է խոսնակը:
Նա նաեւ նշում է, որ հաշվի առնելով վերջին օրերին մամուլի հետաքրքրությունը հարցի շուրջ, եւ ձգտելով կասեցնել տարատեսակ շահարկումների հոսքը՝ հրապարակում են այն անհատների ու կազմակերպությունների անունները, որոնց հետ այս պահի դրությամբ առկա են գույքի նվիրաբերման պայմանագրեր:
«Ընդգծում եմ՝ մի շարք այլ կազմակերպությունների կողմից գույքի (տեխնիկա, բնակմակերես եւ այլն) նվիրաբերման գործընթացը այս պահին դեռ չի ավարտվել»,- գրում է Կարապետյանը՝ հավելելով, որ մնացած անունները կհրապարակվեն պայմանագրերի ստորագրումից հետո:
«Եվս մեկ անգամ նշենք, որ Երեւանի քաղաքային իշխանությունը որդեգրել է բիզնեսի սոցիալական պատասխանատվության ինստիտուտի խթանման սկզբունքը, ինչը միջազգայնորեն տարածված պրակտիկա է: Երեւանի քաղաքապետ Հայկ Մարությանը հրավիրում է Հայաստանում կամ արտերկրում բիզնես ծավալող բոլոր հայրենակիցներին՝ մասնակցելու Երեւանի զարգացմանը:
Եվ այսպես, այս պահի դրությամբ նվիրատու կազմակերպություններն են.
1.Սարգիս Խուրշուդյան, Հայրապետ Հովհաննիսյան -Mercedes Benz Sprinter Chassis 516 Ֆուրգոն 2 հատ
2. «Ն և Ս Քոնսթրաքշն ՍՊԸ, աղբատար MK-1541-14 (ԳԱԶ) -10 հատ, աղբատար KO 427-72 «ԿամԱԶ» -53605-773950-48 -2 հատ, KO440B1-01 «ԿամԱԶ» -65115-3081-50 -2 հատ,
3. Հայաստանի Հանրապետությունում Չինաստանի Ժողովրդական Հանրապետության դեսպանություն, աղբատար «ԿամԱԶ» 65115-773962-50, 1 հատ,
4. «Ալեքս ընդ հոլդինգ» ՍՊԸ, բազմաֆունկցիոնալ «ԿամԱԶ» 43253-3010-69 -3 հատ,
5. «Էյչ բի Էմ գրուպ» ՍՊԸ «ԿամԱԶ» 65115-773962-50, 1 հատ»,- գրում է նա:
Հիշեցնենք, որ Երեւանի ավագանու նոյեմբերի 26-ի նիստից առաջ «Լույս» խմբակցությունը հանդես եկավ հայտարարությամբ: Խմբակցության ղեկավար Դավիթ Խաժակյանը հայտնեց, որ ՀՀԿ-ական նախկին պատգամավոր Սամվել Ալեքսանյանը «ԿամԱԶ»-ներ է նվիրել Երեւանի քաղաքապետարանին, ինչն ամիսներ շարունակ գաղտնի է պահվել: Ավելի ուշ քաղաքապետի խոսնակ Հակոբ Կարապետյանը լրագրողների հետ զրույցում հայտնեց՝ Սամվել Ալեքսանյանը որեւէ նվեր չի արել, եւ այդ տեղեկությունն իրականությանը չի համապատասխանում:
Իսկ նիստի ավարտին լրագրողների հետ ճեպազրույցում Հայկ Մարությանը եւս հերքեց «Լույս» խմբակցության հայտարարությունը: Նա հայտնեց, որ Երեւան քաղաքը նվեր է ստացել 19-20 ավտոմեքենա, մնացած 35-ը գնել է քաղաքապետարանը։ Խոսքն աղբահավաք ավտոմեքենաների մասին է:
