Ռուսաստանի ու Ադրբեջանի համար ՀՀ արևելյան սահմանին ԵՄ առաքելության ներկայության փաստն ուղղակի սպառնալիք է, «Խաղաղության խաչմերուկ․ միավորելով անվտանգությունն ու ժողովրդավարությունը» համաժողովից հետո տեղի ունեցած ճեպազրույցի ժամանակ հայտարարել է «Հանուն Հանրապետության» կուսակցության նախագահ Արման Բաբաջանյանը։
Նրա խոսքով՝ նմանատիպ քննարկումները չափազանց կարևոր են, և «Խաղաղության խաչմերուկի» հանրահռչակումն ու խորքային քննարկումներն օգտակար են։
«Թուրքիայի ներկայացուցիչն այստեղ հանդես է գալիս նաև Ադրբեջանի անունից։ Ակնհայտորեն նրա կողմից բերված փաստարկները, մեղմ ասած, չեն համապատասխանում իրականությանը։ Հայաստանը ցույց է տալիս, թե որքան կառուցողական է տրամադրված, և մենք Թուրքիայից և Ադրբեջանից լսում ենք միայն պատճառներ՝ սահմանի բացման և հարաբերությունների չկարգավորման ուղղությամբ վերապահումներ ունենալու շուրջ»,- նշել է նա։
Բաբաջանյանն անդրադարձել է նաև խաղաղության պայմանագրին՝ նշելով, որ Ադրբեջանն այս պահին ունի ուժային առավելություն և ցանկանում է իր համար նպաստավոր պայմաններով այս գործընթացն ավարտել ու ստանալ առավելագույնը։
«Այս պահին Ադրբեջանը չի կարողանում առավելագույնն ստանալ։ Միջազգային կարևոր գործընթացներ կան, որոնք պայմանավորված են թե՛ տարածաշրջանային ընտրական, թե ԱՄՆ-ում կայանալիք նախագահական ընտրություններով, որից հետո Ադրբեջանն իր համար առավել շահեկան պատուհան է տեսնում։ Չի բացառվում նոյեմբերի վերջին Հայաստանի վրա հարձակում»,- նշել է Բաբաջանյանը։
Երկրորդ պատուհանը, ըստ Բաբաջանյանի, մեծ պատերազմն է Մերձավոր արևելքում, որը ևս Ադրբեջանին կարող է հնարավորություն ստեղծել Հայաստանի և, մասնավորապես, «միջանցքի» նկատմամբ իր հավակնություններն ամբողջացնել։
Բաբաջանյանը հավելել է, որ 2022թ․ ի վեր՝ ԵՄ քաղաքացիական առաքելության տեղակայումից հետո, Ադրբեջանը նվազեցրել է թե՛ էսկալացիաների գնալու շրջանակը, թե՛ թիվը, չունենք տարածքային կորուստներ, իսկ մարդկային զոհեր եղել են այն հատվածներում, որտեղ ԵՄ դիտորդներին թույլ չեն տվել մոնիթորինգ իրականացնել։
«Ադրբեջանն ու ՌԴ-ն այս հարցում ունեն նույնական պատկերացումներ։ Նրանց համար սպառնալիք է ԵՄ դիտորդների գտնվելու փաստը։ Ռուս-ադրբեջանական համալիր պայմանավորվածությունները չեն կարողանում իրականացնել։ ԵՄ դիտորդներն արագ արձագանքում են՝ փակելով ռուս-ադրբեջանական դավադիր պայմանավորվածությունների դուռն ու պատուհանը»,- եզրափակել է Բաբաջանյանը։
