Բաքվի լրատվամիջոցները հայտնում են, որ մի հետաքննող լրագրողների մի խումբ զբաղվել է Ադրբեջանի նախկին Ազգային անվտանգության նախարար Էլդար Մահմուդովի բիզնես-կայսրության գործունեությամբ:
Պարզվել է, որ նախկին պաշտոնյան, որ ներկայումս առանց ելքի իրավունքի բնակվում է Բաքվի մերձակա ամառանոցային փակ առանձնատանը, ժամանակին հասցրել է ամբողջ անշարժ գույքը եւ բանկային ակտիվները գրանցել որդու՝ Անարի եւ դստեր՝ Նարգիզի անուններով:
Մահմուդովների բիզնես-կայսրությունն ընդգրկում է Իսպանիան, Մեծ Բրիտանիան, Լյուքսենբուրգը, Ֆրանսիան, Շվեյցարիան, Չեխիան եւ Լիտվան: Լրագրողական հետաքննությունը պատճառ է դարձել, որպեսզի Մահմուդովի որդին եւ դուստրը շտապ կարգով վերադառնան Բաքու՝ խուսափելով եվրոպական որեւէ երկրի արդարադատությունից:
Պարզվում է, որ Իսպանիայի դատախազությունը Մահմուդովի ձեռնարկատիրական գործունեության օրինականությունը պարզելու նպատակով քրեական գործ է հարուցել, Անար Մահմուդովը եւ նրա քույրը հարցաքննվել են, բայց՝ տեսակապով:
Խիստ հետաքրքիր է, որ ադրբեջանական լրատվամիջոցները Մահմուդովի մասին գրում են այնպես, կարծես նա Բաքվում իշխող վարչակազմի հետ ոչ մի կապ չի ունեցել, սեփական նախաձեռնությամբ է կողոպտել «ընդդիմությանը ֆինանսավորող գործարարներին» կամ քննչական մեկուսարաններում խոշտանգել Ալիեւի քաղաքական մրցակիցներին:
Միլիարդավոր եվրոյի հասնող այդ ունեցվածքին Մահմուդովը տեր է դարձել Իլհամ Ալիեւի գիտությամբ եւ համաձայնությամբ: Եւ եթե եվրոպական որեւէ երկիր, տվյալ դեպքում՝ Իսպանիան, բացահայտի այդ բիզնես-իմպերիայի ակունքները, ապա պարզվելու է, որ ամեն ինչ Ադրբեջանում հայտնի է եղել ի սկզբանե:
Պարզապես Էլդար Մահմուդովն Իլհամ Ալիեւին այնպիսի ծառայություններ է մատուցել, որ անգամ Ազգային անվտանգության նախարարությունը լուծարելուց, մի խումբ բարձրաստիճան աշխատակիցների ձերբակալությունից հետո նա ոչ մի հետապնդման չի ենթարկվել: Պարզապես արգելել են շփվել մարդկանց հետ կամ երկրից մեկնել:
Ասում են՝ նախկին դահիճն ամառանոցում հազվագյուտ ծաղիկներ եւ մերձարեւադարձային մրգեր է աճեցնում: Իսպանական արդարադատության ձեռքը, հավանաբար, նրան չի հասնի:
10:10
Սեպտեմբեր 22, 2026
