Ադրբեջանը միջամտում է Վրաստանի խորհրդարանական ընտրություններին

Դատելով վերջին մի քանի օրերի ձեռնարկումներից՝ Ադրբեջանում Վրաստանի խորհրդարանական ընտրությունների նկատմամբ քաղաքական շատ մեծ հետաքրքրություն եւ միաժամանակ անհանգստություն կա: Կարճաժամկետ հաշվարկով, երեւի, Իլհամ Ալիեւին ձեռնտու է իշխող «Վրացական երազանքի» հաղթանակը:

Բայց չպետք է անտեսել, որ Ալիեւի քաղաքականությունը կառուցված է Եվրոպայի եւ Կենտրոնական Ասիայի ու Չինաստանի միջեւ հաղորդակցության «բանալին Բաքվում է» սկզբունքի վրա:

Իսկ եթե «Վրացական երազանքը» հաղթի եւ շարունակի Ռուսաստանի հետ մերձեցման, ապագայում՝ նաեւ հաշտության քաղաքականությունը, ապա Եվրամիությունը կդադարեցնի Վրաստանում իրականացվելիք ծրագրերը:

Այդ դեպքում Բաքու-Կարս երկաթուղու աշխարհաքաղաքական կարեւորությունը կնվազի, հետեւաբար ոչ ոք «ադրբեջանական բանալու» կարիքը չի զգա, եւ Ալիեւի ավտորիտար վարչախումբը կհայտնվի ավելի մեծ ճնշումների տակ:

Ադրբեջանին դրական ոչինչ չի խոստանում նաեւ վրացական ընդդիմության հաղթանակը, քանի նոր վրացական ժողովրդավարության նկատմամբ Եվրամիության եւ Միացյալ Նահանգների քաղաքական վերաբերմունքն ադրբեջանական հանրությանը կարող է մղել ավտորիտարիզմի դեմ պայքարի:

Ամենեւին էլ պատահական չէ, որ Եվրախորհրդարանը Վրաստանում ընտրություններից երկու օր առաջ Ադրբեջանի վերաբերյալ բանաձեւ է ընդունել, որտեղ ԵՄ գործադիր մարմիններին առաջարկված է ադրբեջանցի մի շարք պաշտոնյաների նկատմամբ պատժամիջոցներ սահմանել, ինչպես եւ վերանայել այդ երկրի հետ ձեռք բերված գազային համաձայնագիրը:

Սա շատ թափանցիկ ազդակ է, որ Ադրբեջանը կարող է իրոք ծանր պատժամիջոցների ենթարկվել, եթե շարունակի Ռուսաստանի հետ ռազմավարական հարաբերությունը: Եվրամիությունը նման հստակ պահանջ ներկայացրել է Վրաստանին, Ադրբեջանի դեպքում վերաբերմունքն առայժմ միանշանակ չէ:

Միացյալ նահանգների Ազգային անվտանգության խորհրդի ներկայացուցիչ Սալիվանը հոկտեմբերի 24-ին զգուշացրել է, որ Վաշինգտոնը հետեւում է, թե հարեւան երկրներից որն է Վրաստանի իշխող կուսակցությանն աջակցություն ցուցաբերում:

Վրացական մամուլում տեղեկություն է հայտնվել, որ Քվեմո Քարթլիում, որտեղ զգալի քանակությամբ ադրբեջանցիներ են բնակվում, քարոզարշավին «ներգրավվել են այլ երկրների քաղաքացի հանդիսացող ադրբեջանցիներ»: Ի՞նչ ազդեցություն ունի այդ միջոցառումների վրա Ադրբեջանի իշխանությունը:

Երրորդ օրն է՝ ալիեւյան քարոզչության խոսափող haqqin.az-ի գլխավոր խմբագիր Ֆաթուլլաեւը Թբիլիսիում իշխող «Վրացական երազանքի» ներկայացուցիչների հետ հարցազրույցներ է վարում: Չպետք է կասկածել, որ նա գործում է Ալիեւի աշխատակազմի հրահանգով:

Թիվ 1 սյունակ, Վահրամ Աթանեսյան