ՊՎԾ պետ Ռոմանոս Պետրոսյանը լրագրողների հետ ճեպազրույցում անդրադարձել է պետական գնումների գործընթացին՝ ընդգծելով, որ երբ հստակ նշված չեն լինում գնվող ապրանքի տեխնիկական պարամետրերը, մեծ սողանցք է առաջանում անբերախիղճ մատակարարների համար։
Ըստ նրա՝ այդ դեպքում գնային մեծ սեգմենտի մեջ գերշահույթ ստանալու համար անբարեխիղճ մատակարարները անորակ սարքեր կամ պիտույքներ են տալիս:
Պետրոսյանն անդրադարձել է նաև մեկ անձից գնումներին.
«Եռամսյակային կտրվածքով պետական կառավարման համակարգում իրականացվում է շուրջ 2800-3000 հանրային գնում: Մեկ անձից գնումները այդ ծավալի մեջ չնչին տոկոս են կազմում:
Մենք իրավասու ենք վերահսկել հանրային գնումների ոլորտն ամբողջությամբ, և մեկ անձից գնումների մասով վերհանված խնդիր երբ լինում է, բնականաբար, առաջարկներ ենք ներկայացնում այդ մարմիններին՝ լավարկելու գնման գործընթացը»,-ասել է նա։
