ԱԺ մշտական հանձնաժողովների համատեղ նիստում 2025 թ. պետական բյուջեի նախագծի քննարկման ժամանակ ՀՀ ԱԳ նախարար Արարատ Միրզոյանն անդրադաձավ նաև ՌԴ-ի հետ հարաբերություններին՝ դրանք որակելով «շատ թափանցիկ»:
«Գիտեք, մենք ամուր տնտեսական կապերով ենք կապված, արտաքին քաղաքական որոշ հարցերում կան տարակարծություններ, միշտ չէ, որ մենք կիսում ենք միմյանց դիտարկումները: Դա վերաբերում է առանձին մեկ-երկու հարթակի, որին միասին անդամակցում ենք, օրինակ՝ ՀԱՊԿ-ը: Մեր վերաբերմունքը այս հարցում ևս հանրահայտ է: Կարծում ենք, որ ՀԱՊԿ-ը պատշաճ չի արձագանքել ՀՀ սահմանների և ինքնիշխան տարածքի նկատմամբ ռազմական ագրեսիային և այլն, բայց կան մի շարք ուղղություններ, որտեղ շարունակում ենք համագործակցությունը, օրինակ՝ ԵԱՏՄ շրջանակում»,- ասաց նախարարը:
Ինչ վերաբերում է Վրաստանի հետ հարաբերություններին, ԱԳ նախարարը հիշեցրեց՝ ռազմավարական հարաբերությունների վերաբերյալ արդեն իսկ ստորագրված փաստաթուղթ ունենք:
«Արդարացի կլինի ասել, որ Վրաստանի հետ մենք, ըստ էության, միշտ էլ ռազմավարական հարաբերություններ ենք ունեցել, բայց հիմա արդեն երկու երկրներն այդ մասին ստորագրած փաստաթուղթ ունեն: Շարունակելու ենք զարգացնել հարաբերությունները Վրաստանի հետ»,- ընդգծեց ԱԳ նախարարը:
Արևելյան ուղղությամբ 2025-ին Հայաստանը կշարունակի համագործակցությունը Հնդկաստանի, Չինաստանի, մյուս գործընկերների հետ:
«Ղազախստանի հետ ունենք բավականին լավ դինամիկա: Երկար տարիների ընդմիջումից հետո տեղի ունեցավ Ղազախստանի նախագահի այցը ՀՀ, և ունենք լիակատար ըմբռնում, որ հարաբերությունների զարգացման դինամիկան 2025 թվականին ևս շատ լավը կլինի»,- հայտնեց Միրզոյանը:
Ինչ վերաբերում է Սաուդյան Արաբիայի հետ դիվանագիտական հարաբերությունների հաստատումից հետո ստեղծված իրավիճակին, հայտնեց, որ կան ակտիվ փոխայցեր:
Նախարարն ընդգծեց՝ ՀՀ կառավարության արտաքին քաղաքական թիվ մեկ առաջնահերթությունը ՀՀ շուրջ խաղաղության, կայունության ապահովումն է և հարևանների հետ հարաբերությունների զարգացումը, նշեց՝ Հայաստանը զարգացնում է նաև հարաբերությունները երկկողմ ուղղություններով մի քանի գործընկերների հետ, ակտիվացնում մասնակցությունը միջազգային տարբեր հարթակներում:
