Հոկտեմբերի 30-ի առավոտյան՝ 05:30-ին իր բնակարանում ձերբակալվել է Ստամբուլի Էսենյուրտ համայնքի քաղաքապետ, էթնիկ քուրդ Ահմետ Օզերը:
Նրան ներկայացվել է Քրդական բանվորական կուսակցության հետ կապի եւ «ահաբեկչությանն օժանդակելու» մեղադրանք:
Ահմետ Օզերը ծնունդով Վանից է, հայտնի գրող, գիտնական-մանկավարժ, որպես պրոֆեսոր, ռեկտորի տեղակալ եւ դեկան է պաշտոնավարել Թուրքիայի մի շարք համալսարաններում:
Էսենյուրտի քաղաքապետի թեկնածու է առաջադրվել քրդամետ DEM կուսակցությունից եւ ընդդիմադիր Ժողովրդա-հանրապետական կուսակցության աջակցությամբ այս տարվա մարտի 31-ի մունիցիպալ ընտրություններում հաղթանակ տարել:
Թուրքական լրատվամիջոցների փոխանցմամբ՝ նա դատարանում չի ընդունել առաջադրված մեղադրանքը:
Նախաքննությունը որպես «իրեղեն ապացույց» է ճանաչել քաղաքապետարանում խուզարկության ժամանակ հայտնաբերված մի ամսագիր, որտեղ քրդական հարցի շուրջ հրապարակումներ կան:
Օզերը դատարանում ասել է, որ ամեն օր հազարավոր մարդիկ են դիմում քաղաքապետարան, ընդունելության արժանանում, եւ ինքը չի կարող պատասխանատու լինել, թե նրանք ինչ կարող են թողնել որեւէ սենյակում:
Օզերը դատարանի որոշմամբ «ժամանակավորապես հեռացվել է» Էսենյուրտի քաղաքապետի պաշտոնից:
Վերջին մեկ-երկու շաբաթների ընթացքում քրդական հարցի շուրջ Թուրքիայում քննարկումներ են սկսվել: Իշխող «Արդարություն եւ զարգացում» եւ Ազգայնական շարժում կուսակցություններն առաջարկել են, որ Քրդական բանվորական կուսակցությունը լուծարվի, դադարեցնի զինված պայքարը եւ «դառնա համաթուրքական քաղաքական գործընթացների մասնակից»:
Մերձավոր Արեւելքում ծավալվող իրադարձությունների համատեքստում Թուրքիայի նախագահ Էրդողանը երկրի առաջնահերթություն է համարել «ներքին կայունության ապահովումը եւ արտաքին սահմանների պաշտպանությունը»:
Թուրքիան լայնածավալ պատժիչ գործողություններ է իրականացնում Իրաքի եւ Սիրիայի հյուսիսում, որտեղ քրդական ուժերը փորձում են կազմավորել իրենց իշխանությունը:
Ահմետ Օզերի ձերբակալությունը կարող է խաթարել «Արդարություն եւ զարգացում» եւ քրդամետ DEM կուսակցության միջեւ քննարկումները:
Էրդողանը նախապատրաստվում է Թուրքիայի նոր սահմանադրություն ընդունել:
Ըստ երեւույթին, դա արվում է, որպեսզի նա եւս մեկ ժամկետով իշխանություն ունենա: Բացառված չէ, սակայն, որ ներքին խմորումները հանգեցնեն ներքաղաքական լուրջ դիմակայության:
Էրդողանը կառավարության վերջին նիստից հետո խստորեն քննադատել է ԱՄՆ-ին, որ Իսրայելի միջոցով «ձգտում է անկայունություն հրահրել Թուրքիայի արեւելյան սահմաններին»։
Թիվ 1 սյունակ, Վահրամ Աթանեսյան
