Կառավարության այսօրվա նիստում վարչապետ Նիկոլ Փաշինյանը, անդրադառնալով «300 դպրոց, 500 մանկապարտեզ» ծրագրի կատարման ընթացքի վերաբերյալ խորհրդակցությանը, հայտարարել է, թե ըստ էության, 90-ականների սկզբից մինչև 2017թ. Հայաստանի Հանրապետությունում կառուցվել է 192 դպրոց, մեծ մասը՝ աղետի գոտում:
Ըստ նրա, խոսքը Շիրակի և Լոռու մարզերի այն դպրոցների մասին է, որոնք 1988 թվականի երկրաշարժից փլուզվել են կամ անհրաժեշտ է եղել զրոյից նոր դպրոցներ կառուցել: Ինչ վերաբերում է «300 դպրոց, 500 մանկապարտեզ» ծրագրի շրջանակում 223 դպրոցում իրականացվող աշխատանքներին՝ Նիկոլ Փաշինյանը նշել է.
«Ընդհանուր առմամբ՝ առնվազն վատ չէ մեր ծրագրի ընթացքը, նույնը կարելի է ասել մանկապարտեզների մասին: Մանկապարտեզների ծրագրի ընթացքն ավելի լավն է: Մենք պետք է հետևողական շարունակենք, և այս ծրագիրը շատ կարևոր է, բայց ինչպես արդեն Կառավարության նախորդ նիստերից մեկի ժամանակ քննարկում եղավ, երկխոսություն եղավ. իսկ ի՞նչ է լինելու 300 դպրոցի ծրագրի՝ այս ծրագրի ավարտից հետո:
Տեղի է ունենալու հետևյալը՝ հաջորդ 300 դպրոցի կառուցման, հիմնանորոգման կամ վերակառուցման ծրագիրն է սկսելու:
Մենք արդեն պայմանավորվեցինք, որ այսօրվանից առանց մեր ընթացիկ շինարարական աշխատանքները կանգնեցնելու, դանդաղեցնելու, վնասելու, մենք գույքագրում ենք այն դպրոցների ցանկը, որ առաջին 300-ն ավարտելուց հետո, պետք է սկսենք երկրորդ 300-ը:
Իսկ դա նշանակում է, այսինքն՝ ակնհայտ է արձանագրումից, որ այդ երկրորդ 300-ի անհրաժեշտությունն ակնհայտ է: Երրորդ 300-ի անհրաժեշտությունը կգնահատվի արդեն երկրորդ 300-ի իրականացումից հետո»:
