ԱԺ «Հայաստան» խմբակցության պատգամավոր, ՀՅԴ-ական Գեղամ Մանուկյանը հայտարարել է, թե Ադրբեջանն ամեն օր Հայաստանին ստիպում է հրաժարվել անկախության հռչակագրից.
«Ձեր ծնողները, ձեր ծնողների տարեկիցները 90-ական թվականներին ամենավատ պայմաններում են ապրել: Դուք հիմա երջանիկ եք, լույս կա, այն ժամանակ լույս չկար, ջեռուցում չկար, վառարան էինք վառում, մրսում էինք։ Բայց մեզ համար այն ժամանակ զոհողությունն արժեք ուներ: Դա Արցախն էր, դա մեր անկախությունն էր։ Եվ այդ ժամանակ մենք թշնամու պահանջը չկատարող երկիր էինք, մենք արժանապատվություն ունեինք»,- ասել է Մանուկյանը:
ԱԺ փոխնախագահ Հակոբ Արշակյանն, արձագանքելով Մանուկյանի հայտարարություններին, ասել է.
«Եթե ճիշտ եմ մտաբերում, 90-ականներին, նույնիսկ՝ արցախյան պատերազմի ժամանակ, Դաշնակցությունը միտինգ էր անում, կառավարության, նախագահի հրաժարական էր պահանջում»։
Ըստ նրա՝ ՀՅԴ-ի համար սովորություն է յուրաքանչյուր պատերազմի ընթացքում միտինգ անել, կառավարական շենքեր գրավել.
«Դուք այդ ամենը համեմում եք ազգային ազատագրական ճառերով ու ձոներով, բայց, ըստ էության, աշխատում եք պետության դեմ, որ պատերազմի մեջ է գտնվում»։
