Ռուսաստանը կարող է երես թեքել Հայաստանից, եթե Հայաստանը խոսի սեփական Անկախության հռչակագրից հրաժարվելու մասին։ Այս մասին Sputnik Արմենիայի մուլտիմեդիոն կենտրոնում հրավիրված մամուլի ասուլիսի ժամանակ ասաց ՀՀԿ կուսակցության մամուլի քարտուղար, ԳՄ անդամ Էդուարդ Շարմազանովը՝ խոսելով Անկախության հռչակագրից և Արցախի ինքնորոշումից հրաժարվելու մասին։
«Պետությունն անկախության հռչակագրի դավանած, գրված և կոնսենսուսով ընդունված կետերի մասին է։ Եթե դու անկախության հռչակագրից հրաժարվում ես, բա ռուսները չե՞ն գա ու թքեն մեր երեսին։ Այդ հռչակագրում գրված է, որ ցեղասպանությունը եղել է Օսմանյան կայսրությունում ու Արևմտյան Հայաստանում։ Ռուսաստանն այն եզակի երկրներից է, որի ընդունած դատապարտման բանաձևում գրված է Արևմտյան Հայաստան եզրույթը»,- ասաց Շարմազանովը։
Նա նաև հավաստիացրեց՝ ՀՀ իշխանությունների կողմից Անկախության հռչակագրի վերաբերյալ հնչեցրած արտահայտություններից հետո ԵՄ այն 27 երկիրը, որ ընդունել են CEPA պայմանագիրը (Արցախի ինքնորոշման հարցի մասին է գրված) այլևս լուրջ չեն ընդունի Հայաստանը։
Շարմազանովը վստահեցնում է՝ ռուսների դիրքերն ու Հայաստանի շահերը վերջին 200 տարում շատ շաղկապված են։
