Պենտագոնը պաշտոնական հաղորդագրություն է տարածել ՀՀ պաշտպանության նախարար Սուրեն Պապիկյանի և ԱՄՆ պաշտպանության քարտուղար Լլոյդ Օսթինի հանդիպման վերաբերյալ: Նրանք հանդիպել են՝ քննարկելու ԱՄՆ-ի և Հայաստանի միջև ռազմավարական հարաբերությունները:
«Ձեր այցը պատմական է: Հայաստանն իր ձեռքը մեկնել է Միացյալ Նահանգներին, և ես հպարտ եմ, որ այսօր ձեզ հյուրընկալում եմ այստեղ։ ԱՄՆ-ն աջակցում է Հայաստանի Հանրապետության անկախությանը, ինքնիշխանությանն ու բարեկեցությանը՝ ընդգծելով, որ երկու երկրների միջև համագործակցությունը շարունակում է ընդլայնվել»,- ասել է Օսթինը` ողջունելով իր գործընկերոջը:
Քարտուղար Օսթինը հայտնել է ԱՄՆ պատրաստակամությունը՝ ՀՀ ԶՈՒ բարեփոխումներին աջակցությունը շարունակելու հարցում։
ԱՄՆ ռազմական գերատեսչության ղեկավարը նաև ընդգծել է Միացյալ Նահանգների աջակցությունը հարավկովկասյան տարածաշրջանում խաղաղությանն ու կայունությանը․ «Մեր զորքերը ուս ուսի ծառայել են Աֆղանստանում «Վճռական աջակցություն» առաքելության ժամանակ, և մենք շարունակում ենք միասին աշխատել ՆԱՏՕ-ի Կոսովոյի ուժերում: Սա մեր առաջին հանդիպումն է, և մենք ունենք լիարժեք օրակարգ: Ես անհամբեր սպասում եմ լսելու Հայաստանի զինված ուժերի ձեր տեսլականի և Հարավային Կովկասում խաղաղության հեռանկարների մասին»:
