Կոռուպցիայի դեմ պայքարը Հայաստանի կառավարության ռազմավարական գերակայությունն է, որի ամենակարևոր բաղադրիչներից է իրազեկվածության բարձրացումը:
«Արմենպրես»-ի հաղորդմամաբ՝ այս մասին ընդգծեց ՀՀ փոխվարչապետ Մհեր Գրիգորյանը, «Համախմբենք ուժերը՝ կանխենք կոռուպցիան» մեկամսյա համապետական արշավի և դրա շրջանակներում կազմակերպված «Կոռուպցիայի դեմ պայքարի մարտահրավերները և դրանց հաղթահարման ուղիները» համաժողովին, որը կազմակերպվել է Կոռուպցիայի կանխարգելման միջազգային օրվա առթիվ:
«Կառավարությունը բազմիցս և ամենաբարձր մակարդակով ընդգծել է, որ կոռուպցիայի դեմ պայքարը մեր ռազմավարական գերակայությունն է:Մենք հավատարիմ ենք կառավարության ծրագրում սահմանված այն դրույթին, ըստ որի՝ կառավարությունը վճռական է բոլոր շահագրգիռ կողմերի ներգրավմամբ անզիջում պայքար մղելու կոռուպցիայի դեմ՝վերջնականապես արմատախիլ անելով կոռուպցիոն բոլոր դրսևորումները: 2018 թվականից ի վեր՝ ՀՀ կառավարությունը հետևողական ջանքեր է գործադրել հակակոռուպցիոն ինստիտուցիոնալ համակարգի ստեղծման և դրա զարգացման ուղղությամբ:
Մենք գիտակցում ենք, որ կոռուպցիայի դեմ արդյունավետ պայքարը հնարավոր է իրականացնել միայն համակարգված և կանոնակարգված ձևով: Մեր քաղաքացիները պետք է գիտակցեն, որ կոռուպցիան խոչընդոտում է առանցքային բարեփոխումների իրականացմանը, ինչն էլ իր հերթին անուղղակիորեն ազդում է իրենց կյանքի որակի վրա»,-ասաց փոխվարչապետը:
Մհեր Գրիգորյանի խոսքով՝ կոռուպցիայի դեմ պայքարում ամենակարևոր բաղադրիչներից է իրազեկվածության բարձրացումը:
Ըստ նրա՝ առանցքային է հակակոռուպցիոն կրթության և իրազեկման թիրախային քաղաքականության մշակումը և անհրաժեշտ գործողությունների իրականացումը, ինչը պետք է ապահովի հակակոռուպցիոն բարեփոխումներում հանրային ավելի մեծ ներգրավվածություն և աջակցություն:
«Կոռուպցիայի դեմ պայքարի համատեքստում առանցքային նշանակություն ունեն նաև կառավարության կողմից իրականացվող հանրային կառավարման բարեփոխումները: Հանրային ծառայությունների արդյունավետության բարձրացումը և դրա շրջանակներում թվայնացման գործընթացի առաջմղումը ուղղակի կերպով նպաստելու են կոռուպցիայի վերացմանը կարևորագույն ոլորտներում»,-եզրափակեց Գրիգորյանը:
ՀՀ Աադարադատության նախարար Սրբուհի Գալյանը տեսաուղերձով ողջունեց և շնորհավորեց ներկաներին Կոռուպցիայի կանխարգելման միջազգային օրվա առթիվ՝ ընդգծելով, որ «Համախմբելով ուժերը՝ կանխենք կոռուպցիան» խորագիրը պատահական չէ, որովհետև մարդը, պետական մարմինը կամ կառավարությունը առանձին-առանձին կոռուպցիայի դեմ չեն կարող պայքարել, այս առումով անհրաժեշտ է համատեղել բոլորի ջանքերը:
«Շուրջ 6 տարի է՝ մեր պետությունը հետևողական պայքար է մղում կոռուպցիայի դեմ՝ հիմքում ունենալով «զրո հանդուրժողականություն կոռուպցիայի հանդեպ» գաղափարը: Տարիների ընթացքում մեզ հաջողվել է ձևավորել ինստիտուտներ, որոնք այս կամ այն ուղղությամբ պատասխանատու են կոռուպցիայի դեմ պայքարի համար:
Մասնավորապես, մեր պետությունում գործում է Հայաստանի հակակոռուպցիոն կոմիտեն, որը պատասխանատու է կոռուպցիոն բնույթի հանցագործությունների բացահայտման համար, գործում է հատուկ ստորաբաժանում դատախազության կազմում, որը պատասխանատու է քրեական գործերի հսկողության համար, ինչպես նաև գործում է հակակոռուպցիոն մասնագիտացված դատարանը: Ուրախությամբ կարող եմ արձանագրել, որ մեր երկիրն այլևս այն երկրների շարքում չէ, որոնք չունեն կոռուպցիայի դեմ պայքարի ինստիտուցոնալ համակարգեր»,-ասաց նախարարը:
ԱՄՆ ՄԶԳ հայաստանյան առաքելության տնօրեն Ջոն Ալելոն, կարևորելով նման համաժողովների դերն, ընդգծեց, որ կոռուպցիան ժողովրդավարական զարգացման ֆունդամենտալ թուլությունն է:
«Հայաստանում ԱՄՆ ՄԶԳ-ի կողմից իրականացվող բարեվարքության ծրագիրը միտված է Հայաստանում կոռուպցիայի հանդեպ զրո հանդուրժողականության ձևավորմանը: Սա ընդգրկում է թիրախային աջակցություն Կոռուպցիայի կանխարգելման հանձնաժողովին և Արդարադատության նախարարությանը՝ որպես հիմնական կառույցներ»,- ասաց Ջոն Ալելոն:
Նա նշեց, որ 2023-ից 2026 թվականների հակակոռուպցիոն ռազմավարությունների գործողությունների պլանավորման գործընթացում նույնպես ԱՄՆ ՄԶԳ-ն աջակցել է, որտեղ հստակ սահմանվում են նպատակներ՝ ընդլայնել համակարգերը, նպաստել ոլորտի աշխատակիցների կարողությունների զարգացմանը, ինչպես նաև ուղեցույցների մշակմանը, որոնք միտված են լինելու համակարգի զարգացմանը:
