Դիմելով Հայաստանի գործող իշխանություններին, արտաքին գործերի նախկին նախարար Վարդան Օսկանյանը հայտարարել է, որ քանի դեռ Լեռնային Ղարաբաղի հարցը լուծված չէ, Ադրբեջանի հետ ցանկացած պայմանագիր պետք է գնահատել որպես ոչ թե Հայաստանի, այլ միայն Նիկոլ Փաշինյանի եւ նրա թիմի անունից ստորագրված:
Առաջին հայացքից թվում է, թե գործ ունենք հայրենասիրական, ազգանվեր զգացմունքայնության եւ ինքնազոհողության գնալու պատրաստակամության հերթական դրսեւորման հետ: Մանավանդ որ Վարդան Օսկանյանը Ստեփանակերտի վերջին կառավարիչներից օժտվել է հանդես գալ որպես Լեռնային Ղարաբաղի խնդրի գիտակ եւ արդարացի կարգավորման նվիրյալ:
Վարդան Օսկանյանի հիշյալ հայտարարությունը, մինչդեռ, ավելի շատ ոչ թե Նիկոլ Փաշինյանին, այլ Իլհամ Ալիեւին է հասցեագրված: Վերջերս Ադրբեջանի նախագահի հատուկ հանձնարարություններով ներկայացուցիչ Ամիրբեկովն արեւմտյան մի շարք լրատվամիջոցների տված հարցազրույցներում այն միտքն է զարգացրել, որ Ադրբեջանը մտադիր է պայմանագիր ստորագրել ոչ թե Նիկոլ Փաշինյանի կառավարության, այլ՝ Հայաստանի հետ՝ որպես պետության:
Ադրբեջանը, նրա պաշտոնյաները մի նպատակ ունեն՝ ցանկացած միջոց, հնարք, խարդավանք, բացահայտ կեղծախոսություն գործի դնել, որպես եւ հայ-ադրբեջանական բանակցությունները ձախողվեն, հարաբերությունների եւ խաղաղության հաստատման պայմանագիր չստորագրվի, եւ դրա պատասխանատվությունը մնա հայկական կողմի վրա:
Վարդան Օսկանյանը տասը տարի արտաքին գործերի նախարար է պաշտոնավարել: Այդ ընթացքում Ադրբեջանը երկու անգամ տապալել է նախնական համաձայնությունները, բայց միջազգային ընկալում է ստեղծել, որ խնդրի կարգավորմանը Հայաստանն է դեմ, որովհետեւ ադրբեջանական տարածքները զավթելու նպատակ ունի:
Բաքվում արտաքին քաղաքական ուղեգծի եւ ավանդույթների փոփոխություն տեղի չի ունեցել: Ադրբեջանը ժամանակին չի ունեցել ԼՂ խնդրի խաղաղ-բանակցային կարգավորման նպատակ: Այսօր արդեն խոսքը Հայաստանի հետ հարաբերությունների կարգավորումից հրաժարվելու մասին է, որին Ալիեւը ձգտում է հասնել հայկական կողմի միջոցով:
Վարդան Օսկանյանը, որպես նախկին, այսպես կոչված՝ ազգային-հայրենասիրական, իշխանության առանցքային ներկայացուցիչ, փաստացի հայտարարում է, որ Փաշինյան-Ալիեւ ստորագրությամբ պայմանագիրը Հայաստանի համար իրավական ուժ չի ունենա:
Նույնը, բայց հակառակ տրամաբանությամբ, ասել է Իլհամ Ալիեւի պաշտոնական ներկայացուցիչը.
«Մենք երաշխիք չունենք, որ Հայաստանի հաջորդ կառավարությունը կնքված պայմանագիրը չեղյալ չի հայտարարի եւ վերստին Ադրբեջանին տարածքային պահանջներ չի ներկայացնի»:
Վարդան Օսկանյանը դա հաստատում է՝ փաստացի ասելով, որ Նիկոլ Փաշինյանից հետո գալով իշխանության, իրենց թիմը նրա ստորագրած պայմանագիրը չի ճանաչի եւ Ադրբեջանի հետ կխոսի այլ դիրքից:
Օսկանյանի այս հայտարարությունը համընկնում է Թուրքիայի արտաքին գործերի նախարար Ֆիդանի այն ձեւակերպմանը, որ Հայաստանը եւ Ադրբեջանը գտնվում են հարաբերությունների կարգավորման շուրջ բանակցությունների եզրագծում:
Իսկ Ադրբեջանի արտաքին գործերի նախարար Բայրամովը, թերեւս առաջին անգամ, հաստատել է հայ պաշտոնակցի բացահայտումը, որ պայմանագրի տեքստի նախաբանը եւ 17 հոդվածներից 15-ը լիովին համաձայնեցված է, մնացած երկու կետերի քննարկումները շարունակվում են:
Ու՞մ է ձեռնտու, որ բանակցությունները մտնեն փակուղի: Առաջին հերթին՝ Ադրբեջանին: Այդ է վկայում ԱՄՆ պետքարտուղարի միջնորդությամբ հայ-ադրբեջանական նախարարական հանդիպումից Բաքվի հրաժարվելը:
Չպետք է կասկածել, որ Բաքուն Վարդան Օսկանյանի հայտարարությունն օգտագործելու է, որպեսզի տեղեկատվա-քարոզչական ֆոն ստեղծի, որ Հայաստանում կայուն եւ վստահելի իշխանություն չկա, պայմանագրի ստորագրումը պետք է հետաձգել՝ մինչեւ Երեւանում ներքաղաքական իրավիճակը կարգավորվի: Ցավալի է, բայց տպավորություն է, որ Հայաստանի նախկին արտգործնախարարը հանդես է գալիս որպես Իլհամ Ալիեւի պատգամախոս:
Թիվ 1 սյունակ, Վահրամ Աթանեսյան
