Թուրքիայի նախագահ Ռեջեփ Էրդողանն ընդունել է Եվրահանձնաժողովի նախագահ Ուրսուլա ֆոն դեր Լայենին։ Բանակցությունների օրակարգում է եղել մասնավորապես Սիրիայի հարցը:
ԶԼՄ-ների տվյալով՝ Էրդողանը հայտարարել է, որ արաբական հանրապետության վերականգնման համար անհրաժեշտ է հարևան, բարեկամ երկրների, նաև Եվրամիության և միջազգային այլ կազմակերպությունների աջակցությունը։
Թուրքիայի նախագահի հետ մամուլի ասուլիսում Ֆոն դեր Լայենը հայտարարել է, որ Եվրամիությունը մինչև տարեվերջ Սիրիային 160 մլն եվրո օգնություն կտրամադրի: Նա նաև հաստատել է Դամասկոսի և Բրյուսելի միջև դիվանագիտական շփումների վերականգնումը:
Ասուլիսի ժամանակ անդրադարձ է եղել նաև Թուրքիա-Եվրամիություն հարաբերություններին: Էրդողանը նշել է, որ ԵՄ-ին անդամակցելը մնում է Թուրքիայի ռազմավարական նպատակը:
«Ակնհայտ է, որ մեր անդամակցությունը ԵՄ-ին կարևոր ներդրում կլինի ինչպես Միության, այնպես էլ մեր երկրի համար»,- նշել է Թուրքիայի ղեկավարը: Նրա խոսքով՝ վերջին իրադարձություններն է՛լ ավելի են ամրապնդել երկրի դիրքերը միջազգային ասպարեզում: Էրդողանը հավելել է, որ Ֆոն դեր Լայենի հետ քննարկել է այն քայլերը, որոնք կարելի է ձեռնարկել Թուրքիայի և ԵՄ-ի միջև համագործակցությունն աշխուժացնելու համար:
