Մեր փախստականների ձայնը չպետք է լռեցվի՝ ո՛չ այսօր, ո՛չ էլ երբևէ

ԱԺ պատգամավորի օգնական Միքայել Միքայելյանը գրել է.

«Այս օրերին հայկական մեդիադաշտում, վերլուծաբանների, ընդդիմադիր պատգամավորների և այլոց կողմից բազմիցս արծարծվել է Ադրբեջանի պնդումները 300,000 ադրբեջանցիների թեմայով:

Մեծ ուշադրություն է դարձվում այդ անհեթեթության լուսաբանումը, սակայն խորհրդային Ադրբեջանից բռնի տեղահանված ավելի քան 500,000 հայերի և նրանց հարյուր հազարավոր ժառանգների ճակատագիրը հաճախ մնում է պատմական լուսանցքում։

Մեդիայի և քաղաքական դաշտի երկակի ստանդարտներն են, որ որոշակի շրջանակներն այդքան հեշտությամբ հիշեցնում են ադրբեջանական փախստականների մասին՝ անտեսելով սեփական հայրենակիցների ցավը:

Սա ոչ միայն անարդարություն է նրանց նկատմամբ, այլ նաև մեր ազգային ինքնության նկատմամբ հարված: Այս մոտեցումը խեղաթյուրում է իրականությունը՝ թողնելով զգացում, թե մենք ինքներս չենք կարևորում մեր հայրենակիցների կրած տառապանքները:

Վարչապետ Նիկոլ Փաշինյանը մեկ անգամ չէ, որ խոսել է Խորհրդային Ադրբեջանից բռնի տեղահանված ավելի քան 500,000 փախստականների իրավունքների մասին։

Նվազագույնը մեդիադաշտում ամեն օր պետք է ակտիվորեն բարձրաձայնենք հայ փախստականների հարցը, ներկայացնենք այն փաստերով ու վկայություններով։

Մեր փախստականների ձայնը չպետք է լռեցվի՝ ո՛չ այսօր, ո՛չ էլ երբևէ»։