Թրամփի վարչակազմը կրճատում է USAID-ի արտաքին օգնության պայմանագրերի 90 տոկոսը

Չորեքշաբթի ԱՄՆ նախագահ Դոնալդ Թրամփի վարչակազմը հայտարարել է, որ չեղարկում է ԱՄՆ Միջազգային զարգացման գործակալության (USAID) արտաքին օգնության պայմանագրերի ավելի քան 90 տոկոսը՝ մոտ 60 միլիարդ դոլարի ընդհանուր օգնությունն ամբողջ աշխարհում: Նախատեսված է թողնել USAID-ի մի քանի նախագիծ, որոնք փաստաբանները կփորձեն փրկել վարչակազմի հետ շարունակվող դատական գործընթացների ժամանակ՝ գրում է The Economic Times-ը:

Ըստ Associated Press-ի այս քայլը զգալիորեն նվազեցնում է ԱՄՆ միջազգային օգնությունը և արտացոլում է նահանջը ԱՄՆ երկարամյա արտաքին աջակցության քաղաքականությունից, որն օգնում էր ԱՄՆ շահերին՝ կայունացնել մյուս պետություններն ու տնտեսությունները, ստեղծել դաշինքներ:

Հունվարի 20-ին Թրամփը կարգադրել էր 90-օրում վերանայել բոլոր ծրագրերը, պարզելու, թե որոնք են արժանի շարունակության, և գրեթե մեկ գիշերվա ընթացքում դադարեցրեց բոլոր միջոցների հատկացումը օտարերկրյա օգնության համար, ֆինանսավորումից զրկվել են հազարավոր ծրագրեր: Թրամփի վարչակազմը և Մասկի Կառավարության արդյունավետության դեպարտամենտը աշխատանքից ազատել են կամ հարկադիր արձակուրդի ուղարկել USAID-ի աշխատակիցների մեծամասնությանը:

Շահույթ չհետապնդող կազմակերպությունների իրավաբանները զգուշացրել են, որ սպասվում են ավելի շատ պաշտոնանկություններ: Պետքարտուղարությունը հայտնել է, որ պետքարտուղար Մարկո Ռուբիոն քննարկել է պաշտոնանկությունների հարցը: