Ի՞նչ է անոնսավորում Մոսկվան

Ռուսաստանի նախագահի օգնական, Ծովային կոլեգիայի նախագահ Նիկոլայ Պատրուշեւը հարցազրույց է տվել «Ազգային պաշտպանություն» ամսագրին եւ ձեւակերպել, որ «Լոնդոնը շահագրգված է ռուս-ամերիկյան հարաբերությունների կարգավորման քայլերի, ինչպես նաեւ Ուկրաինայի հարցով բանակցությունների ձախողմամբ»:

Այդ տեսակետը նա հիմնավորում է հետեւյալ դիտարկմամբ. «ՆԱՏՕ-ի եվրոպական թեւը շարունակում է Բալթյան տարածաշրջանում Ռուսաստանին շրջափակելու իր քաղաքականությունը՝ անտեսելու Մոսկվայի եւ Վաշինգտոնի միջեւ երկխոսության վերականգնումը: Կարծում եմ, որ իրավիճակի ներկայիս սրացումը ծրագրված է Լոնդոնում, որ շահագրգռված է ռուս-ամերիկյան հարաբերությունների կարգավորման ձախողմամբ»:

Ռուսաստանի նախագահի օգնականը, որ տեւական ժամանակ զբաղեցրել է Անվտանգության դաշնային ծառայության տնօրենի, ապա եւ Անվտանգության խորհրդի քարտուղարի պաշտոնը, ուշադրություն է հրավիրում Եվրամիության վերջին գագաթաժողովին, որտեղ ընդունվել է «Եվրոպայի մասշտաբային ռազմականացման որոշում» եւ եզրակացնում, որ «ռազմական սպառնալիքները միայն մեծանալու են»: Նա բարձր է համարում Բալթիկայում Ռուսաստանի նավահանգստային ենթակառուցվածքների եւ ազատ նավագնացության դեմ սպառնալիքների հետագա ահագնացումը: Պատրուշեւը հայտարարել է, որ «Ֆիննական ծոցը ոչ մեկի սեփականությունը չէ»: Ինչպես հայտնի է, Ֆինլանդիան անցյալ տարի անդամակցել է ՆԱՏՕ-ին: Ռուսաստանի նախագահի օգնականն, ամենայն հավանականությամբ, նկատի ունի այդ հանգամանքը, քանի որ անմիջապես ավելացնում է, որ Բալթիկայում Ռուսաստանը «հզոր դաշնակից ունի, դա Բալթյան նավատորմն է»:

Նա անոնսավորել է, որ Ռուսաստանն ամեն ինչ անելու է, որպեսզի այդ տարածաշրջանում ուժեղ ռազմական ներկայություն ունենա, քանի որ խոսքը վերաբերում է Արկտիկայում տնտեսական եւ գիտա-հետազոտական գործունեության ծավալմանը:

Քաղաքական մեկնաբանների մեծամասնությունը կարծում է, որ Գրենլանդիայի նկատմամբ ԱՄՆ նախագահ Դոնալդ Թրամփի հավակնությունները նույնպես պայմանավորված են Արկտիկայում ազդեցության ամրապնդման նկատառումներով: Դատելով Ռուսաստանի նախագահի օգնականի դիտարկումներից, Մոսկվան համարում է, որ այդ հարցում նույնպես համաձայնության պետք է հասնի միայն Վաշինգտոնի հետ՝ անտեսելով ոչ միայն Մեծ Բրիտանիայի, այլեւ Եվրամիության շահերը:

Պատրուշեւի հարցազրույցի հրապարակմանը զուգահեռ Reuters-ը տեղեկություն է տարածել, որ վերջին երկու-երեք շաբաթներին ռուս եւ ամերիկացի փորձագետները համատեղ քննարկումներ են ունեցել մի փաստաթղթի շուրջ, որ Ռուսաստանը ներկայացրել է որպես իր անվտանգության երաշխիքների «համալիր ցանկ»:

Լրատվամիջոցը չի բացահայտում փաստաթղթի մանրամասնությունները, բայց ընդգծում է, որ դրանք տարբեր ժամանակ Ռուսաստանի պաշտոնյաների եւ նախագահ Պուտինի կողմից հնչեցվել են:

Փաստացի Ռուսաստանի նախագահի օգնական Պատրուշեւը բացահայտում է, որ Մոսկվան եւ Վաշինգտոնը քննարկում են Եվրոպայում եւ հարակից տարածաշրջաններում ազդեցության ոլորտների բաժանման հնարավորությունը, իսկ Մեծ Բրիտանիան եւ Եվրամիությունը՝ փորձում «խոչընդոտել»:

Եթե աշխարհաքաղաքական իրավիճակի սկզբունքային գնահատկանը դա է, ապա նույնիսկ ուկրաինական ռազմաճակատում հրադադարի հաստատումը կայունության, առավել եւ խաղաղության ոչ մի հեռանկար չի խոստանում: Ո՞րն է Ռուսաստանի ռազմա-տնտեսական հավակնությունների սահմանը, ի՞նչ հակաքայլեր ունի Եվրամիությունը: Միացյալ Նահանգները որքանո՞վ է հաստատակամ Եվրոպան «հանձնելու» մտադրության մեջ: Պատրուշեւը փաստացի համաեվրոպական անկայունություն է գուժում:

Թիվ 1 սյունակ, Վահրամ Աթանեսյան