Երբեմն դեղ է պետք խնդիրը լուծելու համար. Թրամփ

ԱՄՆ նախագահ Դոնալդ Թրամփը հայտարարել է, որ չի հրաժարվի օտարերկրյա ապրանքների վրա սահմանված բարձր մաքսատուրքերից, քանի դեռ այդ երկրները չեն հավասարակշռի իրենց առևտուրը ԱՄՆ-ի հետ:

Air Force One ինքնաթիռում լրագրողների հետ զրուցելիս Թրամփն ասել է, որ չի ցանկանում տեսնել շուկաների անկում, բայց հավելել, որ շուկաների ներկայիս վիճակը չի անհանգստացնում․ «Երբեմն դեղ է պետք խնդիրը լուծելու համար»,- նշել է նա:

Այս խոսքերը հնչել են այն պահին, երբ համաշխարհային ֆինանսական շուկաները պատրաստվում էին երկուշաբթի օրը նոր անկումով սկսել առևտուրը: Միաժամանակ, Թրամփի թիմը փորձել է հանգստացնել շուկաները՝ հայտնելով, որ ավելի քան 50 երկիր արդեն կապ է հաստատել՝ մաքսատուրքերի շուրջ բանակցելու համար:

«Ես խոսել եմ շատ առաջնորդների հետ՝ եվրոպացիների, ասիացիների, աշխարհի տարբեր մասերից: Նրանք պատրաստ են համաձայնության գալ: Ես նրանց ասացի, որ չեմ ընդունի ձեր երկրների հետ առևտրային դեֆիցիտ: Դա չենք անի, որովհետև ինձ համար դեֆիցիտը նշանակում է կորուստ: Մենք ուզում ենք հավասարակշռված առևտուր կամ գոնե զրոյական տարբերություն»,- ասել է Թրամփը: