Նախագահ Արմեն Սարգսյանը չստորագրեց «Սահմանադրական դատարանի մասին» սահմանադրական օրենքում փոփոխություններ և լրացումներ կատարելու մասին օրենքը հարակից օրենքով, ինչը նշանակում է, որ նախագահը կամ 21-օրյա ժամկետում ստորագրում և հրապարակում է օրենքը, կամ դիմում է Սահմանադրական դատարան՝ օրենքի սահմանադրականությունը որոշելու համար։ Եթե այս երկու գործողություններից որևէ մեկը չի կատարվում, ապա Սահմանադրության 129-րդ հոդվածի համաձայն՝ ԱԺ նախագահը 5-օրյա ժամկետում ստորագրում և հրապարակում է օրենքը։
Նման հանգուցալուծման դեպքում օրենքի հակասահմանադրականության հարց չի կարող ծագել։ Պետք է նկատել, որ որևէ նորմատիվ-իրավական ակտով չի կարող սահմանվել ավելի կարճ ժամկետ, քանի որ Սահմանադրությունն ունի բարձրագույն իրավական ուժ և միայն 22-րդ օրը ԱԺ նախագահը կարող է ստանալ լիազորություն օրենքը ստորագրելու համար։
Այսպիսով՝ նախագահը դեռ ունի ժամանակ որոշելու իր անելիքը, իսկ հնարավոր տարբերակներից է ՍԴ դիմելը, բայց այստեղ ևս կա մի կարևոր հանգամանք, որքան էլ փորձեն վիճարկել, այս պահի դրությամբ ուժի մեջ են մտել Սահմանադրական փոփոխությունները և Սահմանադրական դատարանում մնացել են միայն 6 դատավորներ։ Դիցուք՝ երեկ նախատեսված ՍԴ հերթական նիստը չի կայացել՝ քվորում չլինելու պատճառով։ Նիստին չէին ներկայացել Ալվինա Գյուլումյանը, Հրանտ Նազարյանը և Ֆելիքս Թոխյանը։ Ուստի ավելի տրամաբանական տարբերակ է, որ սահմանված 21-օրյա ժամկետից հետո, ԱԺ նախագահ Արարատ Միրզոյանը կարող է ստորագրել և հրապարակել օրենքը։
Քրիստինե Հովսեփյան
