Ինձ համար անթույլատրելի է այս պատճառաբանությամբ նիստերը անընդհատ հետաձգելը. դատավորը՝ Սերժ Սարգսյանի պաշտպաններին

Երևանի ընդհանուր իրավասության դատարանի Ավանի և Նոր Նորք նստավայրում` դատավոր Վահե Միսակյանի նախագահությամբ, այսօր՝ հուլիս 2-ին, ՀՀ երրորդ նախագահ Սերժ Սարգսյանի և մյուսների գործով դատական նիստին դատավորը հայտարարեց, որ իր համար անթույլատրելի է դատական նիստերը անընդհատ հետաձգելը (համավարակի պատճառով):

Սերժ Սարգսյանի պաշտպանները մինչ այժմ, պայմանավորված համավարակային իրավիճակով, դատարանին մի քանի անգամ միջնորդել են՝ հետաձգել դատական նիստը։

«Մի հանգամանք պետք է փաստենք, որ ունենք նաև այլ իրավիճակ, օրենսդրության պահանջներ, գործի քննության ողջամտության պահանջը, դատարանի գործունեությունը արտակարգ ռեժիմի պայմաններում օրենսդրությամբ չի սահմանափակվում»,- ասաց դատավորը։

Հիշեցնենք, որ ըստ մեղադրական եզրակացության՝ Սերժ Սարգսյանի կազմակերպմամբ և Բարսեղ Բեգլարյանի դրդմամբ, Սամվել Գալստյանի ու Գևորգ Հարությունյանի օժանդակությամբ, Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Սերժ Սարգսյանն իրեն առաջադրված մեղադրանքը չի ընդունում։