Ինչպես արդեն տեղեկացրել ենք, այսօր երեկոյան հզոր պայթյուն է որոտացել Լիբանանում` Բեյրութի նավահանգստում։ Նախնական տեղեկությունների համաձայն` ուժգին պայթյունը վնասել է շենքեր և բնակարաններ, կան զոհեր՝ այդ թվում Լիբանանի «Քաթայիբ» կուսակցության գլխավոր քարտուղար Նազար Նաջարյանը:
Նավահանգստին մոտ է գտնվում հայաբնակ Բուրջ Համուդ թաղամասը, որտեղ ևս վնասներ են եղել: Դեպքից անմիջապես հետո Գլխավոր հանձնակատար Զարեհ Սինանյանը հեռախոսազանգ է ունեցել Լիբանանում ՀՀ դեսպան Վահագն Աթաբեկյանի հետ: Դեսպանը նշել է, որ արդեն իսկ կապ է հաստատել տարբեր կազմակերպությունների հետ` պարզելու, թե որքան է նախնական վնասը, և արդյոք կան զոհեր:
Պայթյունից 15 կմ հեռու գտնվող ՀՀ դեսպանատունը ևս վնասվել է, կոտրվել են բոլոր պատուհանները։ Մահվան դեպքերի մասին դեռևս որևէ տեղեկություն չկա։ Նոր լուրերի առկայության պարագայում մենք կկատարենք հավելյալ թարմացումներ,-տեղեկացնում է Սփյուռքի գլխավոր հանձնակատարի գրասենյակը:
