2020 թվականի օգոստոսի 17-ին Ուկրաինայի արտգործնախարար Դմիտրի Կուլեբան հայտնել է, որ Ուկրաինան իր դեսպանին Մինսկից կանչում է խորհրդակցությունների ՝ բելառուսա-ուկրաինական հարաբերություններում իրավիճակի «կարդինալ փոփոխության» կապակցությամբ:
«Ինչպես գիտեք, անցած ուրբաթ պաշտոնական Մինսկը ձերբակալված Վագներցիներին հանձնեց Ռուսաստանին ՝ չնայած առկա էին բոլոր իրավական ու բարոյական նորմերը՝ նրանց Ուկրաինային հանձնելու համար» , – նշել է նախարարը։
«Դրանից հետո Ալեքսանդր Լուկաշենկոն բազմիցս և ամբողջովին անհիմն կերպով մեղադրեց Ուկրաինային Բելառուսի դեմ ուղղված ոչ բարեկամական քայլերի համար: Իսկ Բելառուսում իրավիճակի կարգավորմանը Ռուսաստանի և ՀԱՊԿ-ի հնարավոր ակտիվ ներգրավվածության մասին հաղորդագրություններից որակապես նոր սպառնալիքներ են առաջանում ինչպես քաղաքացիների անձնական անվտանգության, այնպես էլ ընդհանուր առմամբ տարածաշրջանային անվտանգության համար»։
«Փաստերի և գործողությունների համադրությունը, ինչպես նաև Բելառուսում իրադարձությունների զարգացումը, որտեղ հասարակությունը անվստահություն է հայտնել երկրում կայացած նախագահական ընտրությունների պաշտոնական արդյունքներին, արմատապես փոխում են իրավիճակը բելառուս-ուկրաինական հարաբերություններում», – ընդգծում է Ուկրաինայի արտգործնախարարությունը:
Բելառուսում Ուկրաինայի դեսպան Իգոր Կիզիմին խորհրդակցությունների է կանչվելու Կիև ՝ «նոր իրականության մեջ բելառուս-ուկրաինական հարաբերությունների հեռանկարները գնահատելու համար»:
«Պատմության մեջ սա առաջին անգամն է, որ մենք այսպիսի քայլի ենք դիմել Բելառուսի հետ հարաբերություններում և մենք դա անում ենք բացառապես Մինսկի անընդունելի գործողությունների պատճառով», – ավելացրել է Ուկրաինայի ԱԳՆ ղեկավարը:
Նյութը՝ currenttime.tv, թարգմանություն՝ Կարեն Կոլոսով
