Վրաստանում համամասնական ընտրություններին դեմ է ջավախահայությունը

Մոտ մեկ շաբաթ է՝ Վրաստանում շարունակվում են ցույցերը։ Երեկ ցուցարարները փակեցին Ռուսթավելի պողոտան։ Թեև «Վրացական երազանք» կուսակցության ղեկավար Բիձինա Իվանիշվիլին հայտարարել էր, որ 2020 թվականի խորհրդարանական ընտրությունները պետք է անցկացվեն համամասնական ընտրակարգով, այնուամենայնիվ ցուցարարները շարունակում են ցույցը՝ հայտարարելով, որ պետք է կատարվեն իրենց մյուս պահանջները ևս, այդ թվում՝ պաշտոնանկ անել ներքին գործերի նախարարին, ձերբակալված ցուցարարներին ազատ արձակել և ժողովրդի դեմ ուժ կիրառած ոստիկաններին պատժել։
Վրաստանի խորհրդարանի հայազգի պատգամավոր Հենզել Մկոյանը, անդրադառնալով Վրաստանում տեղի ունեցող զարգացումներին, նշեց, որ թեև իշխող կուսակցությունը որոշել է, որ հաջորդ ընտրությունները լինելու են համամասնական ընտրակարգով, մեր շրջանի համար դա լավ չէ, որովհետև մեծամասնական պատգամավորը փոքրամասնությունների համար եղել է լիդեր, իր ժողովրդի ներկայացուցիչ կենտրոնական իշխանության մեջ։
«Մեր ժողովուրդը չի ուզում համամասնականը։ Ես անգամ ելույթ եմ ունեցել և ասել, որ մեր ժողովուրդն ուզում է ունենալ իր լիդերը, որ իրենց խնդիրները ներկայացնի կենտրոնական կառավարությանը։ Մեզ համամասնական ընտրակարգը ձեռնտու չէ»,-հավելեց պատգամավորը։

Ավելին՝ 1in.am