ՀՀ ԿԳՄՍ փոխնախարար Ժաննա Անդրեասյանը ֆեյսբուքյան իր էջում գրել է.
Արցախի Հանրապետության կրթության, գիտության և մշակույթի նախարարությունը հայտնում է պատերազմից տուժած կրթական հաստատությունների և շահառուների խմբի վերաբերյալ նոր տեղեկություններ։ Հիշեցնեմ, որ երեկ Գեղարքունիքի մարզպետը խոսեց մարզում երկու դպրոցի վնասվելու մասին։ Ունենք նաև զոհեր ու վիրավորներ սովորողների շրջանում։ Հայտարարության տարածումը տարբեր հարթակներում խրախուսվում է։
Քսան օր շարունակ թուրք-ադրբեջանական ահաբեկչական պատերազմի ընթացքում միջազգային նորմերով արգելված զինատեսակներից հրետակոծվում են Արցախի Հանրապետության կրթամշակութային հաստատությունները։ Առ այսօր թիրախավորվել ու ավերվել են 18 դպրոցական շենք, 6 մանկապարտեզ, չորս մշակութային օջախ։ Թշնամու գերճշգրիտ կրկնակի հարվածից ավերվել է Շուշիի Ղազանչեցոց Սուրբ Ամենափրկիչ եկեղեցու գմբեթը։
Թուրք-ադրբեջանական ահաբեկչության ու կատաղի ագրեսիայի պատճառով խախտվել և խատվում է շուրջ 33․000 մարդու կրթության իրավունք։ 24․000 աշակերտ դպրոց չի հաճախում, 4016 երեխա՝ մանկապարտեզ, 4986 ուսանող՝ արհեստագործական ուսումնարան, քոլեջ և բարձրագույն ուսումնական հաստատություն։ Խորը ցավով և կսկիծով եմ նշում, որ ունենք նաև զոհված ուսանողներ։
