Երևան քաղաքի մի շարք բնակիչներ աղբի տոպրակներով և Հայկ Մարության նախընտրական քարոզարշավի նկարներով ակցիա են իրականացնում քաղաքապետարանի մոտ: Քաղաքացի Սոնա Աղեկյանը ֆեյսբուքյան իր էջի միջոցով տեղեկացնում է, որ Երևանի Շենգավիթ վարչական շրջանի բնակիչները սեփական ուժերով են աղբահանություն իրականացնում։
«Տոպրակներով աղբը տանում ենք երևանի քաղաքապետարան՝ մատուցելու պատկան մարմիններին, որոնք փորձում են Երևանը մեծ աղբավայր դարձնել, ինչը, իհարկե, նրանց չի հաջողվելու, որովհետև մենք ամեն օր մաքրելու ենք մեր քաղաքը», – ֆեյսբուքյան ուղիղ եթերում հայտարարեց Սոնա Աղեկյանը։
Արդեն քաղաքապետարանի մոտ ակցիայի մասնակիցները պատկան մարմիններին կոչ արեցին դուրս գալ աշխատավայրից և պատասխան տալ քաղաքի անմխիթար վիճակի համար: Այնուհետև ակցիայի վայր եկավ Շենգավիթ վարչական շրջանի ղեկավար Ռազմիկ Մկրտչյանը։
«Այնպես չէ, որ քաղաքապետարանն ասում է ՝ ամեն ինչ լավ է, եթե լավ լիներ, մենք կասեիինք՝ լավ է, շնորհակալություն «Սանիթեք»-ին։ Ժողովուրդ ջան, եկե՛ք պրովոկացիա չանենք», – ասաց Մկրտչյանը։
Ակցիայի մասնակիցներից մի քանիսը ոստիկանության կողմից բերման ենթարկվեցին:
Տեսանյութը՝ Սոնա Աղեկյանի ֆեյսբուքյան էջից:
