ԱԱԾ-ն Փաշինյանին տրամադրել է տեղեկատվություն, որի պատճառով վարչապետը հրաժարվել է արտահերթ ընտրություններից

ԲՀԿ-ն շարունակում է պնդել, որ Նիկոլ Փաշինյանի վարչապետության կամ որևէ պարագայում վարչական լծակի տիրապետելու պայմաններում, անիմաստ է անցկացնել ընտրություններ՝ լրագրողների հետ զրույցում ասաց պատգամավոր Գևորգ Պետրոսյանը։

Իսկ պատճառը պարզ է. «Եթե Նիկոլ Փաշինյանը ընդունակ է իրեն թույլ տալ ամենահասարակ առիթներով ուժայիններին օգտագործել ժողովրդի դեմ, ես պատկերացնում եմ, թե նա ինչ վայրագությունների հանձնարարություններ է տալու ընտրությունների օրը, որպեսզի կարողանա իր իշխանությունը հավերժացնել»։

Պատգամավորը կարծում է, որ վարչապետը ընտրությունների չգնաց՝ վախենալով իր վարկանիշից, նաև, ըստ շրջանառվող լուրերի, ԱԱԾ-ն Նիկոլ Փաշինյանին տրամադրել է տեղեկատվություն, որից վախեցած, վերջինս հրաժարվել է արտահերթ ընտրություններից։

«Մի քանի օր առաջ ասում էր՝ եկեք գնանք արտահերթ ընտրությունների և ստուգենք իմ արածների լեգիտիմությունը, հիմա հրաժարվում է»,- հիշեցրեց Պետրոսյանը։

Լրագրողի այն նկատառմանը, որ իշխանության ներկայացուցիչները շեշտում են՝ ընդդիմությունը հրաժարվեց արտահերթից, ԲՀԿ-ականը հակադարձեց․

«Նիկոլ Փաշինյանը ե՞րբ է ընդդիմության կարծիքը հաշվի առել, նա այն մարդն է, ով ամենաանթաքույց ատելությունն ունի ընդդիմության նկատմամբ»։

Քրիստինե Հովսեփյան