2020-ին լիզինգի ծրագրով ծախսվել է շուրջ 9 մլրդ դրամ, 576 շահառուի կողմից ձեռք է բերվել 950 միավոր տեխնիկա. վարչապետ

ՀՀ կառավարությունն այսօրվա նիստում փոփոխություններ կատարեց «Հայաստանի Հանրապետությունում ագրոպարենային ոլորտի սարքավորումների ֆինանսական վարձակալության՝ լիզինգի պետական աջակցության ծրագիրը հաստատելու մասին» որոշման մեջ:

Էկոնոմիկայի նախարար Վահան Քերոբյանի խոսքով՝ որոշման նախագծի ընդունումը պայմանավորված է Հայաստանում ագրոպարենային ոլորտի սարքավորումների ֆինանսական վարձակալության՝ լիզինգի պետական աջակցության ծրագրի պայմանները բարելավելու և լիզինգով տրամադրվող սարքավորումների շրջանակն ընդլայնելու նպատակով պետական օժանդակություն ցուցաբերելու անհրաժեշտությամբ:

Ծրագիրը, որը մեկնարկել է 2018 թվականի հուլիսից, ՀՀ կառավարության տարբեր որոշումներով մի շարք փոփոխությունների և լրացումների է ենթարկվել:

Մասնավորապես՝ ձեռք բերվող սարքավորումների արժեքների հանրագումարի 230 մլն դրամ վերին շեմը բարձրացվել է մինչեւ 450 մլն դրամ, իսկ կորոնավիրուսի տնտեսական հետևանքների չեզոքացման 24-րդ միջոցառման շրջանակներում գյուղատնտեսական հումք վերամշակողների համար՝ մինչեւ 1 մլրդ դրամ։

Այս որոշմամբ առաջարկվում է յուրաքանչյուր լիզինգառուի կողմից ձեռք բերվող սարքավորումների արժեքների հանրագումարի առավելագույն 450 մլն դրամի շեմը բարձրացնել մինչեւ 1 մլրդ դրամի:

Նախարարն ընդգծեց, որ ծրագիրը միտված է խոշորացնել գյուղատնտեսությունը, այսինքն՝ խթանել գյուղատնտեսներին ավելի մեծ ծրագրեր ձեռնարկել:

Վարչապետ Նիկոլ Փաշինյանը եւս կարեւորեց ծրագիրը՝ նշելով, որ 2020-ին երկու ոլորտ կա, որտեղ աճ է գրանցվել, եւ դրանցից մեկը գյուղատնտեսությունն է. «Այս հարցում իր դերն ունի նաեւ այս ծրագիրը: 2020-ին լիզինգի ծրագրով ծախսվել է շուրջ 9 մլրդ դրամ, 576 շահառուի կողմից ձեռք է բերվել 950 միավոր տեխնիկա: Սա բավականին մեծ թիվ է ՀՀ-ի համար: 2019-ին էլ մենք շատ հաջող ավարտեցինք այս ծրագիրը»: