«Հանուն հայրենիքի փրկության» շարժման փետրվարի 20-ի հանրահավաքին ընդառաջ նախապատրաստական աշխատանքները ընթացքի մեջ են։
Դիցուք՝ ծավալուն հարցազրույցով հանդես եկավ Սերժ Սարգսյանը, որում մանրամասն անդրադարձավ 44-օրյա պատերազմին։ Հաշվի առնելով այն, որ երրորդ նախագահը իր կառավարման տարիներին «շատ քիչ է խոսել», 3 ժամ տևողությամբ դարակազմիկ հարցազրույցը լուրջ ներդրում է, նույնիսկ նախապատրաստական աշխատանքների անկյունաքարն է հանդիսանում։
Ռոբերտ Քոչարյանն էլ փորձում է հարցեր լուծել մոսկվաներում, ամենավերևներում հասնել «դաբռոյի», որն այդքան կենսական է իշխանափոխության հասնելու համար։
Բնականաբար, Վազգեն Մանուկյանը ամենօրյա ռեժիմով հերթապահում է Օպերայի հարակից տարածքում, խոսում է շարքային քաղաքացիների հետ, բացատրում է պահի լրջությունն ու «զոռով հեռացնելու» անհրաժեշտությունը։
Նկատենք նաև, որ Անժելա Թովմասյանի «դուքանում», իրար հերթ չտալով, ժողովրդին դեպի մեծ հանրահավաք են ուղղորդում հանրապետականները, 16-ի կամ 15-ի զանազան ներկայացուցիչներ։ Ինչպես ասում են՝ շարունակվում է «պրոպագանդան» բոլոր մակարդակներում։
Ծառուկյանական թևն էլ իր գործն է անում։ Հրեն՝ Գագիկ Ծառուկյանը հայտարարեց Ռուսաստանի Դաշնություն մեկնելու մասին։ Չիմացանք՝ հասավ, թե չհասավ, բայց կարևոր չէ, քանի որ առաջին հերթին արժևորվում է ժողովրդի վրա թողնված էֆեկտը։ Պակաս ազդեցիկ չէր նաև, որ հենց հանրահավաքի նախաշեմին Գևորգ Պետրոսյանը լքեց խմբակցությունը, քայլ, որ արժանի է հասարակության լայն շերտերի գնահատանքին։
Իսկ Հայ Յեղափոխական Դաշնակցությունն աշխատանքներ է տանում մի քանի ուղղություններով. նախկին դաշնակցականն է գնում խորհրդարան՝ տրամադրությունները շոշափելու, Իշխան Սաղաթելյանն է փորձում ամեն կերպ սատարել Վազգեն Մանուկյանին մանր – մունր հանդիպումների ժամանակ, երեկ հաղորդագրություն տարածվեց, որ քաղաքական ուժը հանդիպել է ՌԴ արտակարգ և լիազոր դեսպան Սերգեյ Կոպիրկինի հետ և զրուցել «Հայաստանի ներքաղաքական զարգացումներից»…
Միով բանիվ՝ համակողմանի, լուրջ աշխատանքին լծվել են ամենքը իրենց չափով՝ ակնկալելով բեկումնային արդյունք։
Քրիստինե Հովսեփյան
