Ռուսաստանի Դաշնությունը հրավիրված չի եղել Մյունխենի անվտանգության համաժողովին

Մեզ համար անհասկանալի է, թե ինչո՞ւ է արևմուտքը ձգտում քննարկել գլոբալ խնդիրները առանց Ռուսաստանի Դաշնության մասնակցության՝ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ անդրադառնալով Մյունխենի անվտանգության համաժողովին, որին հրավիրված են եղել ԱՄՆ-ը, ԵՄ-ն, ՄԱԿ-ը և ԱՀԿ-ն։

Թերևս այս հարցին պատասխանել է ԱՄՆ նորանշանակ նախագահ Ջո Բայդենը իր՝ Մյունխենի անվտանգության համաժողովի առցանց ելութում։ Վերջինս ընդգծել է, որ Ռուսաստանը «ագրեսիվ քաղաքականություն» է վարում, հարձակվում է արևմտյան ժողովրդավարությունների վրա՝ փորձելով թուլացնել ՆԱՏՕ-ն և Եվրամիությունը, քանի որ «Կրեմլի համար ավելի հեշտ է վախեցնել առանձին երկրների, քան բանակցություններ վարել միացյալ տրանսատլանտյան միության հետ»։ Բայդենը նաև շեշտել է. «Ես բոլորին ասում եմ՝ Ամերիկան վերադարձել է։ Տրանսատլանտյան միությունը վերադարձել է, և մենք հետ չենք նայի»։

Հատկանշական է, որ ռուս օգտատերերը չեն կիսում Մարիա Զախարովայի զարմանքը և հասկանում են Ռուսաստանի մեկուսացման իրական պատճառները։ Նրանք իրենց մեկնաբանություններում հիշեցնում են՝ ընդամենը օրեր առաջ Ռուսաստանը մերժեց՝ ընդդիմադիր Ալեքսեյ Նավալնիին անհապաղ ազատ արձակելու ՄԻԵԴ որոշումը՝ նշելով, որ այն հակասում է Ռուսաստանի օրենսդրությանը և չի պարունակում հղում օրենքի նորմերին։

Ոմանք էլ մեջբերում են խորհրդարանական խմբակցությունների հետ հանդիպման ժամանակ նախագահ Պուտինի այն հայտարարությունը, որ իրենք թույլ չեն տա արտաքին միջամտություն և հարվածներ Ռուսաստանի ինքնիշխանությանը։

Քրիստինե Հովսեփյան